Завхан аймгийн Улиастай суманд тарваган тахлын сэжигтэй тохиолдол илэрсэн тул өнөөдөр аймгийн Онцгой комисс яаралтай хуралдлаа.
Улиастай сумын иргэн 39 настай Д нь 7 хоногийн өмнө тарваганы мах худалдан авч гэр бүлээрээ боодог хийж идсэн байна. Одоогоор халуурсан, булчин, толгой өвдсөн шинж тэмдэгтэй. Дуудлагын дагуу аймгийн Нэгдсэн эмнэлгийн Халдвартын тасагт яаралтай тусгаарлажээ.
Аймгийн Онцгой комисс дараах шийдвэрүүдийг гаргалаа. Үүнд:
1. Цагдаагийн байгууллага нэгдүгээр хавьтлын 9 хүнийг гэрийн тусгаарлалт, хяналтад авах
2. Зоонозын өвчин судлалын төв нэг, хоёрдугаар хавьтлыг тогтоох, шинжилгээ хийх, хяналтад авах ажлыг яаралтай зохион байгуулахаар болов.
3. Онцгой байдлын Ерөнхий газраас өгсөн чиглэлийн дагуу Улиастай сумаас орох, гарах хяналтын найман цэг дээр тээврийн хэрэгслийн хөдөлгөөнийг 2020 оны 7-р сарын 25-ны өдрийн 21:00 цагаас тодорхойгүй хугацаагаар хязгаарлах шийдвэрийг тус тус гаргалаа.
Шинжилгээг өнөөдөр 15:00 цагт авсан бөгөөд эхний хариу 48 цагийн дараа гарна.
Ард иргэд олуулаа нэг дор цуглахгүй, тарвага агнахгүй, тарваганы мах идэхгүй байх, хорио цээрийн дэглэмийг сайтар сахихыг уриалж байна.
Сэтгэгдэл (0)
Сэтгэгдэл бичигдээгүй байна