Б.Отгонсүх: 2025 онд хотын түгжрэлийг 50 хувь бууруулна

Жил бүр хичээлийн шинэ жил эхлэхэд, замын түгжрэл иргэдийн толгойны өвчин болдог. Мөн Дарь-Эхийн 3,3 км автозамын засвар дуусах дөхсөн ч ундааны бөглөөний зузаантай тэнцэх хэмжээний нимгэн гэх иргэдийн шүүмжлэлтэй тулгараад байна. Тэгвэл түгжрэл болон Дарь-Эхийн замын асуудлаар Нийслэлийн засаг даргын орлогч Б.Отгонсүхээс тодрууллаа.

Тэрбээр "Долдугаар сарын 27-нд Дарь-Эхийн зам засварын ажил хийгдэж эхэлсэн. Өнөөдөр /2020.09.04/хучилтаа аваад дуусч байна. Замын хөдөлгөөнийг өнөөдөр нээнэ. Энэхүү зам есөн метрийн өргөнтэй долоон сантиметр зузаантай асфальтан суурьтай, ус зайлуулагчтай, гэрэлтүүлэгтэй, явган хүн явах талбайтай гэдгээрээ онцлогтой. Замаа барьж дууссаны дараа дээж авч,  хэдэн сантиметр зузаан байгааг харж болно.Стандартын дагуу хийж гүйцэтгэсэн. Талхан дээр тавьсан масло шиг зам барихгүй" гэв.