2020/10/30
USD 2,811

Г.Солтаны давж заалдах шатны шүүх хурал өнөөдөр болно

О.Шүрэнцэцэг
2020/09/22

УИХ-ын гишүүн асан Г.Солтанд УИХ-ын гишүүнээр ажиллаж байхдаа "Монгол шаазан" ХХК-д 950 сая төгрөгийн зээл авч, өөрийн гэр бүлдээ давуу байдал бий болгосон үндэслэлээр шүүхээс гурван жилийн хорих ял оноосон. Тэрбээр анхан шатны шүүхээс оноосон ялыг хүлээн зөвшөөрөлгүй гомдол гаргасан бөгөөд өнөөдөр давж заалдах шатны шүүх хурал нь товлогджээ.

Шүүхээс УИХ-ын гишүүн Г.Солтаныг өөрийн хамаарал бүхий “Монгол шаазан” ХХК-д “Малын тэжээл үйлдвэрлэх” төслийн зориулалтаар урт хугацааны хөнгөлөлттэй зээл авахын тулд УИХ-ын гишүүн асан, ХХААХҮ-ийн сайд асан Б.Батзоригт хууль бусаар нөлөөлөн, мөн төсөл сонгон шалгаруулах хорооны дарга Д.Энхбат, гишүүн С.Төгсбилэг нарт тухайн төслийг шалгаруулах шаардлагатай гэж хэлж, хууль бус үүрэг чиглэл өгсөн. Ингэхдээ 2018 оны тавдугаар сарын 14-ний өдрийн А/88 дугаартай тушаалаар “Монгол шаазан” ХХК-нд 950 сая төгрөгийн урт хугацаатай, хөнгөлөлттэй зээл олгох шийдвэр гаргуулж, өөрт болон өөрийн гэр бүлд эдийн засгийн давуу байдал бий болгосон гэмт хэргийг үйлдэхэд хамтран оролцсон гэм буруутайд тооцоод буй.

Хуульд зааснаар Г.Солтаны нийтийн албанд томилогдох эрхийг таван жилийн хугацаагаар хасч, гурван жилийн хугацаагаар хорих ял шийтгэж, уг ялыг нээлттэй хорих ангид эдлүүлэхээр шийдвэрлэсэн билээ. Одоогоор УИХ-ын гишүүн асан Г.Солтанаас гадна УИХ-ын гишүүн асан Д.Дамба-Очир 3.5 жил, УИХ-ын гишүүн асан Б.Ундармаад 2.6 жилийн хорих ял оноосон бол УИХ-ын гишүүн асан, ХХААХҮ-ийн сайд асан Б.Батзориг-т 40 сая төгрөгийн торгууль ногдуулсан юм.


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна