П.Мөнхболд: Гадуур явж байхад хүмүүс муухай харахаар сандарсандаа "гараа ардаа" авчихдаг

Та бүхэндээ комьпютерийн засварчин, зариг.мн сайтын гэрээт ажилтан П.Мөнхболдыг танилцуулан хүргэж байна. 

П.Мөнхболд нь төрөлхийн саажилттай мэндэлсэн. Анх түүний амьдрал тэргэнцэртэй л төсөөлөгддөг байсан. Харин П.Мөнхболдыг н.Пунцаг гэдэг буянтай хүн алхаж, гишгүүлж сургасан. Тэрбээр өдгөө сургуулиа амжилттай төгсөж,  МУИС-ийн номын сангийн замын урд байрлах Кибер төвд мэргэжлээрээ ажиллаж байна. Тодруулбал П.Мөнхболд комьпютерийн оношилгоо, засварын үйлчилгээг хийдэг. Өөртөө ажлын байр бий болгож хоёр жил ажиллаж байна. Надтай ижил зовлонтой хүмүүст хандаж хэлэхэд урагшаа хараад алхаад бай, хэн ч юу гэж хэлсэн тоох хэрэггүй, анхаарлаа дуртай зүйлдээ төвлөрүүлээд алхаад бай гэсэн урмын үгийг хэлсэн юм. П.Мөнхболд нийгэмд бусдаас жаахан өөр хүмүүсийн нэгэн төлөөлөл. Гэхдээ тэр гутарч, унжийж, бухимдаж суудаггүй. Ажил нь түүнийг "маргааш ч бас хичээх хэрэгтэй" гэдэг урам зориг, утга учрыг, томоос том зорилгыг өгдөг талаар ярьсан. Түүний мөрөөдөл өөрийн гэсэн байртай болох. Тэрбээр ажилладаг ажлынхаа ойролцоо жижиг өрөө түрээслэн амьдардаг. Цаашид зүтгэж байгаад өөрийн гэсэн байртай болчихвол, хүмүүст ажлын байр бий болох талаараа ярьлаа. Гудамжаар алхахад зарим хүмүүс муухай харахаар сандарсандаа гараа ардаа авдаг , заримдаа хүмүүс намайг согтуу байна гээд шоолоход сэтгэлээр унаж, эмзэглэдэг талаар ярьсан юм.