Хяналтын ажилтан Т.Түвшинжаргал угаартах эрсдэлд орсон гэр бүлийг аварчээ

Тавантолгой түлш ХХК-ийн Хэрэглэгчдэд үйлчлэх албаны Хяналтын ажилтан Т.Түвшинжаргал угаартах эрсдэлд орсон гэр бүлийг аварлаа.
Тэрээр аравдугаар сарын 3-4 шилжин шөнө Баянзүрх дүүргийн 21 дүгээр хороонд өөрин хариуцсан хэсгийнхээ гудамжаар хяналт тавиад явж байтал айлын угаарын хийн мэдрэгч дуугарах чимээ гарчээ. Хаана дуугараад байгаад олохоор хүүхдээ дагуулаад хайсан ч олоогүй аж. Тиймээс хариуцсан бүх айл руугаа утасдаж асуухад ихэнх айлын угаарын хий мэдрэгч дуугараагүй гэсэн хариу өгчээ. Харин нэг айлын утас руу залгатал утас нь дуудах дохио өгөөд тасарсан байна. Тиймээс хажуугийнх нь айлтай утсаар холбогдож асуутал тэр айлын угаарын хий мэдрэгч дуугарч байна гэсэн хариу өгчээ.
Ингээд хаягийн дагуу гэрт нь очиход нялх хүүхэдтэй эмэгтэй зуухныхаа янданг сугалж, өрхөө битүүлж татсан байжээ. Мөн угаар мэдрэгч дуугараад хүүхэд амраахгүй юм гээд тэжээлийн зайг нь авсан байж.
Хяналтын ажилтан Т.Түвшинжаргал өрхийг нь татаж, янданг нь хийгээд, угаарын хийн мэдрэгчийг асаатал 547 PPM зааж байсан гэнэ. Энэ нь хүний амь насанд эрсдэл учруулахуйц хэмжээ юм.
Ингээд Т.Түвшинжаргал гэрт нь агаар сэлгэлт хийж, хүүхдийг нь сүүгээр угжиж, ээжид халуун бүлээн юм уулгаж, угаарын хийн мэдрэгч дуугүй болтол ажиглаж, тухайн айлд заавар зөвлөгөө өгсөн байна. Хэрэв Т.Түвшинжаргал угаарын хийн мэдрэгч дуугарч байгааг сонсоогүй бол шуурхай арга хэмжээ аваагүй бол угаартах эрсдэлтэй байв.

https://www.facebook.com/mongo...