Америкийн экс Ерөнхийлөгч Дональд Трамп нь Ардчилсан намаас Америкийн Ерөнхийлөгчид сонгогдсон Жо Байденыг АНУ-ын түүхэн дэх хамгийн муу Ерөнхийлөгч гэж тодорхойлжээ. Тэрээр Флорида мужийн Орландод болсон консерватив үзэлтнүүдийн уулзалтын үеэр “Бид Байдены захиргаа тааруухан байна гэдгийг бүгд мэдэж байсан ч ингэтэл байх юм гэж хэний ч санаанд ороогүй. ...Байдены захиргааа нь шинэ ажлын байрны эсрэг, гэр бүлийн эсрэг, хил хязгаарын эсрэг, эрчим хүчний эсрэг, эмэгтэйчүүдийн эсрэг, шинжлэх ухааны эсрэг байгаагаа харуулж орхилоо” гэсэн байна. Мөн “Бид ганцхан сарын дотор Америк хамгийн нэгдүгээр гэсэн зарчмаас холдож, Америк хамгийн сүүлд нь гэдэг боллоо” гэжээ.
Трамп нь Байденыг Парисын цаг агаарын тохиролцоог ямар ч тооцоо, үндэслэлгүйгээр дагаж, Америкийн эдийн засагт ноцтой хохирол учруулж байна гэж буруутгав. Тэрээр “Жо Байден АНУ-ыг Парисын цаг агаарын тухай маш үнэтэй бөгөөд шударга бус гэрээнд буцаалаа. Бид ганцаараа цэвэр энерги ашиглаад Хятад ашиглахгүй, Орос ашиглахгүй, Энэтхэг ашиглахгүй бол ямар ашиг байна вэ?” гэж шүүмжилжээ. Мөн Байден Канадаас газрын тос дамжуулах “Keystone XL” хоолойг барих ажлыг зогсоосныг шүүмжилж “Байден 42 мянган маш сайн цалинтай ажлын байрыг устгалаа” гэжээ.
Түүнчлэн Трампын бодлоор Байден нь цаашид ч ийм бодлого хэрэгжүүлсэн хэвээр байвал Америк нь Орос ба Ойрх Дорнодын газрын тосноос бүрэн хамааралтай болно гэж анхааруулаад “Байдены хэрэгжүүлж байгаа бодлого бол газрын тос олборлодог бусад улсуудын хувьд асар их ашиг, харин АНУ ба түүний гайхамшигтай иргэдийн хувьд асар их алдагдал” гэжээ.
Сэтгэгдэл (0)
Сэтгэгдэл бичигдээгүй байна