“Twitter” –т Грек улс Америк эсвэл Францаас байлдааны усан онгоц авах тухай мэтгэлцээний үеэр АНУ-аас Грект цэргийн аттаще хийж байсан Роберт Палм нь Грекийг “гуйлгачин” гэж нэрлээд олон тэрбумын зэвсгийн наймаанд нөлөөлж болзошгүй улс дамнасан хэрүүл дэгдээжээ.
Грек нь өнгөрсөн оны намар “Rafale” сөнөөгч онгоц, байлдааны дөрвөн шинэ усан онгоц аваад, одоо зэвсэглэлдээ байгаа “MEKO” дөрвөн төрлийн дөрвөн усан онгоцыг сайжруулан шинэчлэх гээд нийт олон тэрбум еврогийн өртөгтэй хөтөлбөр хэрэгжүүлж эхлэх тухайгаа зарласан.
Шинэ дөрвөн усан онгоцыг Франц эсвэл АНУ-ын алинаас нь авах ёстой талаарх нэлээд ширүүн мэтгэлцээн “Twitter”-т өрнөөд байгаа юм байна. Мэтгэлцээний үеэр нэг хэрэглэгч “Миний хүсэж байгаа” ба “Миний авч чадах” гэсэн талбартайгаар янз бүрийн байлдааны усан онгоцны зураг байршуулжээ. Эдгээр зурагт цэргийн атташе асан Роберт Палм тайлбар хийхдээ “beggars can't be choosers” буюу “гуйлгачид сонголт хийдэггүй” гэж бичсэн нь Грекийн хэрэглэгчдийн уур хилэнг асар ихээр хүргэсэн байна.
Европын холбооны хамгийн ядуу улсуудын нэг гэгддэг Грек нь Османы эзэнт гүрнээс чөлөөлөгдсөн хувьсгалынхаа 200 жилийн ойг хэдхэн өдрийн өмнө тэмдэглээд байсан нөхцөлд АНУ-ын зэвсэгт хүчин, батлан хамгаалах аж үйлдвэрлэлийн Грект төлөөлөн сууж, Грекийн Засгийн газраас шагнал авч байсан Роберт Палмулс орныг нь “гуйлгачин” гэж нэрлэсэнд “Twitter”-ийн Грек хэрэглэгчид маш ихээр уурлаж, бухимджээ. Улмаар олон хэрэглэгч цэргийн атташе нь манай улсын тухай ийм бодолтой байдаг юм бол шинэ усан онгоцнуудыг АНУ-аас биш Францаас авах хэрэгтэй гэцгээсэн байна.
Уурлаж шүүмжилсэн хүний тоо олон болоход РобертПалм нь жиргээгээ устгаад, хүчтэй сэтгэл хөдлөлдөө автаж бодлогогүй жиргэсэндээ уучлал гуйжээ.
Грек нь санхүүгийн хувьд нэлээд хүнд байдалтай байгаа ч Кипр арлыг тойрсон асар их шатдаг хийн нөөцийн ашиглалтаас болж Турктэй газар нутаг булаалдсан бүс нутгийн дайн тулаан хийж магадгүй нөхцөл байдал үүсээд байгаа юм. Иймд Грек нь ядуу ч гэлээ Батлан хамгаалах зардлаа олон тэрбумаар нэмэгдүүлэхээс өөр аргагүй болоод байгаа аж. Грекийн эдийн засгийн гол тулгуур болсон аялал жуулчлал, эрчим хүч, хөдөө аж хуй, хүнсний үйлдвэрлэл, арилжаа нь цар тахлын улмаас нэлээд хүнд байдалд байгаа аж.
Сэтгэгдэл (0)
Сэтгэгдэл бичигдээгүй байна