2021/05/19
USD 2,811

Хар арьстан залуу цагдаа нарт буудуулсан Миннеаполис хотод онц байдал зарлаад байна

Н.Мичидмаа
2021/04/13

Хар арьстан залуу цагдаа нарт баривчлагдах явцад оргон зайлах оролдлого хийгээд буудуулж амиа алдсан хэрэг АНУ-ын Миннесота мужийн Миннеаполис хотод өнгөрсөн даваа гарагт гарсан. Хэрэг гарсан тухай мэдээлэл интернэтээр тархсан даруйд 500 гаруй хүн хотын цагдаагийн газрын гадаа цугларан эсэргүүцлээ илэрхийлж эхэлсэн байна. Тэднийг тарах шаардлага тавьсан ч биелүүлээгүй тул цагдаа нар нулимс асгаруулагч хий, резин сум хэрэглэн тараажээ. Үүний дараа буудуулж амиа алдсан Данте Райтын амиа алдсан газар 200 гаруй хүн цугларч эсэргүүцэл илэрхийлэх явцад цагдаа нарын эсрэн хүч хэрэглэж, цагдаагийн хоёр ч машиныг гэмтээжээ. Удалгүй Миннеаполис хотын энд тэнд эсэргүүцлийн далимдуулсан дээрэм тонуул гарч эхэлсэн тул хотын мэр нь онц байдал зарлан хөл хорио тогтоожээ.

 

Цагдаа нар Райтыг замын хөдөлгөөний дүрэм зөрчлөө гэж зогсоон шалгах үеэр түүнийг баривчлах тогтоол гарсан байсныг мэдээд саатуулах гэсэн юм байж. Гэтэл баривчилгаа явуулсан цагдаагийн ажилтан манаруулан ухаан алдуулдаг цахилгаан төхөөрөмжийн оронд гар бууныхаа гохыг дарсан байсан нь хожим бичлэгээс ил болжээ. Одоо хотын аюулгүй байдлыг сахих үүднээс АНУ-ын Үндэсний гварди буюу дотоод цэргийн ангиудыг хотод оруулжээ.

 

Трампын үед ийм хэрэг гарах болгонд Ардчилсан намыг дэмжигч сонин, хэвлэлүүд Ерөнхийлөгчийг болон түүний явуулж байгаа бодлогыг шүүмжилж, гудамжинд гарч эсэргүүцэл илэрхийлэгч, үймээн таригч залуусыг өөгшөөж, бараг л шууд дэмжиж байгаагаа илэрхийлдэг байсан. Харин Байден гарч ирснээр дээрэм тонуул үйлдэгчдийн талаар ямар арга хэмжээ бодитоор авахыг харах л үлдэж байна гэж зарим шинжээчид мэдэгджээ.


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна