Украины Засгийн газар сумны хэд хэдэн үйлдвэр зэрэг байгуулах төлөвлөгөөтэй байгаа тухай Донбассын асуудлаарх Гурван талт уулзалтын бүлгийн Киевийн зөвлөх хийдэг А.Арестович мэдэгдсэнийг “РИА” агентлаг уламжилжээ.
А.Арестович энэ талаар ярихдаа “Ганц үйлдвэр хангалтгүй. Ганц байвал хэт эмзэг, давхар хийх ёстой” гээд сумны үйлдвэр хоёрыг барихад 2-3 жил зарцуулна гэжээ. Үүний өмнө Украин нь Луганск дахь сумны үйлдвэрийн бүтээгдэхүүнээр зэвсэгт хүчнээ сум, галт хэрэгслээр хангадаг байсан. Гэвч 2014 оны үйлд явдлаар энэхүү сумны үйлдвэр нь салан тусгаарлагчдын мэдлийн бүсэд үлдэж, Украины мэдлээс гарчээ. Украины батлан хамгаалах салбарын аж үйлдвэрүүдийгнэгтгэсэн “Укроборонпром” концерний тэргүүн Игорь Фоменко нь бүр 2020 онд Украинд сум, галт хэрэгслийн үйлдвэр байхгүй болсон гээд бүгдийг шинээр байгуулах шаардлагатай тухай ярьж байжээ.
Иргэний дайны байдалтай байгаа Украин нь одоо гар буунаас эхлээд их буу хүртэл бүх төрлийн сумаа гаднаас импортлон оруулж ирж байгаа юм байна. Зөвлөлтийн үеэс үлдсэн агуулахад тодорхой хэмжээний сум байдаг ч тэдгээрийн зарим хадгалалтын хугацаа дууссан тул байлдааны шаардлага хангахгүй болсон аж. Украинд сум хэрэгсэл нийлүүлэгч гол улсууд нь Польш, Болгар, Румын, Чех гэх мэт хуучин Варшавын гэрээний гишүүн орнууд юм байна. Эд бүгд НАТО-д элсэхэд Зөвлөлтийн стандартын сумнууд хэрэггүй хог болон агуулахад нь асар ихээр үлдээд байсныг одоо ийнхүү Украинд нийлүүлж багагүй ашиг олдог аж.
Сэтгэгдэл (0)
Сэтгэгдэл бичигдээгүй байна