2021/05/08
USD 2,811

Украйнд үндэсний идээ ундааны салбарыг коммунизмын нөлөөнөөс цэвэрлэхийг уриалжээ

Н.Мичидмаа
2021/04/19

Украйн нь Зөвлөлтийн коммунист дэглэмийг үлдэгдэл нөлөөг устгах ажлын хүрээнд нийтийн хоол, үндэсний идээ ундааны салбарыг энэхүү нөлөөнөөс ангижруулах хэрэгтэй тухай Украйны нэртэй мастер тогооч Е.Клопотенко нь Польшийн “Nowa Europa Wschodnia” сонинд ярьжээ.

Нийтийн хоол, үндэсний хоолны салбар нь үндэсний хэл бичгээс дутахааргүй чухал ач холбогдолтой тул энд үлдэж хоцорсон Зөвлөлтийн нөлөөг яаралтай арилгах хэрэгтэй гэсэн байна. Хүмүүсийг Зөвлөлтийн үед бараг хүчээр шахуу тулгаж сургасан хоол ундны зуршлаас нь салгаж, үндэсний уламжлалаа шинээр бүрэлдүүлэхэд түлхэц өгөх хэрэгтэй гэж. Үүний тулд тусгай нэмэлт татварын механизм бий болгох хэрэгтэй гэсэн байна. Улмаар Зөвлөлтийн үед түгээмэл хэрэглэгддэг байсан “Нийслэл” салат, “Бүрмэл загас”, компот гэх мэт коммунизмын ядуу тарчиг амьдрал шингэсэн хоол унд хийж байгаа цайны газар, ресторануудаас нэмэлт татвар авдаг болох хэрэгтэй гэжээ. Харин эдгээр хоолноос татгалзаад үндэснийхээ хоол ундыг түлхүү хийвэл дээрх нэмэлт татвараас чөлөөлдөг байх ёстой гэсэн байна. Ингэхдээ Украйн нь борщ-ыг үндэсний хоол ундны дээж болгон баяжуулж, үндэсний хоол ундыг сэргээх үндэс болгох ёстой гэсэн байна. Борщ-ыг орос хоол гэдэг нь буруу борщ бол гагцхүү Украйн хоол гээд энэ мэт өөрчлөлтийг сургууль, цэцэрлэгийн цайны газруудад түлхүү нэвтрүүлэх ёстой гэсэн байна.

Украйн нь 2014 оны Майдан хувьсгалаас хойш Зөвлөлтийн үеийн, коммунист дэглэмийн үлдэгдэл нөлөө гэж болох юм болгоныг эрчимтэй устгах, татан буулгах кампанит аяныг өрнүүлж байгаа юм. Энэ кампанит ажлын хүрээнд ажлын байр, үйлчилгээний газар зөвхөн украйн хэлээр ярьж, орос хэлээр ярьсан хүмүүст торгодог, эрүүгийн хариуцлага тооцдог болсон, ТВ болон интернэтээр Орос хэл дээр кино гаргахыг хориглосон. Гудамж талбайг Орос, Зөвлөлтийн нэрт хүмүүсийнх байсныг олон арваар нь сольсон. Одоо ийнхүү хоол ундны салбар дах Зөвлөтийн, Оросын нөлөөг арилгахаар шийдэж байгаа бололтой. Хэлхэн сарын өмнө Украйны мах комбинатуудад өдийг хүртэл “Радянська” буюу “Зөвлөлтийн”  нэртэй хиам үйлдвэрлэж байгааг эрс шүүмжилж, нэрийг нь яаралтай өөрчлөхийг идэвхтнүүд шаардсан байна. 

 


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна