Энэтхэгт крематори буюу цогцос шатаах зуухнууд COVID-19-аар нас барсан хүмүүсийг шатаахдаа ачааллаа дийлэхгүй эвдэрч байгаа тухай “Al Jazeera” суваг мэдээлж байна. Түүнчлэн Энэтхэгийн Засгийн газар нь нөхцөл байдлыг хянаж байгаа гэсэн сэтгэгдэл төрүүлэхийн тулд корона вирусийн улмаас нас барсан хүний тоог багасган мэдээлж байгааг тус суваг онцолжээ.
Жишээлэхэд, Энэтхэгийн өрнөд нутагт байрлах Гужаратмуж дах шатдаг хий ба түлээгээр ажилладаг шатаах зуухнууд ямар ч завсарлагаа үгүйгээр хэт удаан ажилласны улмаас төмөр эд ангиуд нь хайлж эхэлсэн байна. Иймд зуухны эзэд шатаах явцад хоёр гурван цагийн завсарлага авч зуухыг хөргөж байхаас өөр аргагүй болсон аж. Тус мужийн шатаах зуухны удирдах газрын нэгдсэн сангийн тэргүүн Камлеш Сэйлор энэ талаар “Al Jazeera” сувагт ярихдаа “Бид цогцсуудыг цаг алдалгүй шатаахын тулд хоногийн 24 цагийн турш ажиллаж байна” гэж ярьжээ. Улмаар зөвхөн энэ мужийн хот гэлтгүй Энэтхэг даяар том хотуудад шатаах зуух асар их ачаалалтай ажиллахтай зэрэгцээд эмнэлгүүдэд ор хүрэлцэхгүй, хэвтэж эмчлүүлж байгаа хүмүүст хүчилтөрөгч, эм бэлдмэл хүрэлцэхгүй байгаа мэдээлэл тасрахгүй байна.
Судлаачдын тогтоосноор Энэтхэгт өдгөө коронавирусын“В1617” гэдэг шинэ хувилбар газар авч тархаад байгаа юм байна. Энэ хувилбар нь корона вирусийн анхдагч хувилбараас илүү халдвартай эсвэл илүү үхэл тарих аюултай эсэх, өргөнөөр ашиглагдаж байгаа вакцинууд бодитоор эсэргүүцэж чадах эсэхийг эрдэмтэд хараахан эцэслэн тогтоож амжаагүй байгаа аж.
Энэтхэгт хоногт 24 мянган хүн халдвар авч, 2700 хүн нас барж байгаа юм байна. Ингэснээр Энэтхэг нь халдвар авсан хүний тоо ба корона вирусээс болж нас барсан хүний тоогоор АНУ-ын дараа ордог болоод байна. Тус улсад байдал тун эвгүй болсон тул “Pfizer” компани вакцинаа өөрийн өртгөөр нь худалдан авахыг санал болгосон байна. Үүнтэй зэрэгцээд Энэтхэгийн Засгийн газар ОХУ-д хандан “Спутник V” вакцин олноор худалдан авсан ч эхний багцууд тавдугаар сарын сүүлээр орж ирэхээр болсон байна. Иймд одоо Энэтхэгийн Засгийн газар чанартай вакцин олноор орж ирэх хүртэл тархалтыг аль болох хумих гэсэн тун ярвигтай асуудалтай тулгараад байгаа юм байна. Энэтхэгт дэлхийн нийтийн бүх шашин шүтлэг байдгаас гадна орон нутгийн шинжтэй хэдэн зуун жижиг шашин байдаг тул олон зуун хүнийг хамарсан шашны ямар нэг баяр ёслол, арга хэмжээ байсхийгээд л зохион байгуулагдаж байдаг нь корона вирус хурдацтай газар авах бас нэг таатай нөхцөл болж байгаа аж. Түүнчлэн корона вирусийн тархалт ба түүнээс үүдэлтэй нас баралт газар авахыг дагаад намууд хоорондын өрсөлдөөн ширүүсэж, эрх баригчдыг эсэргүүцсэн эсвэл дэмжсэн жагсаал цуглаан олноор зохион байгуулагдаж, түүнд нь хэдэн зуун мянган хүн оролцох нь хэвийн үзэгдэл болж хувираад байгаа нь корона вирусийн тархалтыг хумихад сөргөөр нөлөөлж байгаа юм байна.
Сэтгэгдэл (0)
Сэтгэгдэл бичигдээгүй байна