Чех Орос хоорондын дипломат тулаан ид дүрэлзэж байна. Чех эхлээд Оросын 18 дипломат ажилтныг тагнуул гэж буруутган нутгаасаа албадан гаргахаар шийдсэний хариуд Орос 20 ажилтныг нь нутгаасаа хөөхөөр болсон. Чех нь Оросыг ийм хатуу хариу барина гэж бодоогүй гэдгээ хүлээн зөвшөөрч нэг өдөр чимээгүй байсны эцэст бүр ч айхтар хариу барив. Тэд Орост тулган шаардах бичиг хүргүүлсэн юм. Яг л дайны үеэр бууж өгөхийг шаардсанаас ялгаагүй. Оросыг нутгаасаа хөөсөн 20 ажилтныг бүгдийг нь нэн даруй буцаан хүлээж авахыг шаардаж, шаардлагыг нь хангаагүй тохиолдолд бүр ч хатуу хариу барина гэсэн байна. Үүнд Ерөнхийлөгчийн хэвлэлийн төлөөлөгч Песков “Бидэнтэй тулган шаардах маягаар харилцаад ирээдүйгүй тухай Ерөнхийлөгч Путинилгээлтдээ дурдсан” гэж хариулжээ. Иймд Чех нь Прага дах Оросын Элчин сайдын яамны ажилтан 63 хүнийг тавдугаар сар дуусахаас өмнө нутгаасаа гарахыг шаардсан байна. Түүнчлэн 2014 он Врбетицед болсон дэлбэрэлтэд Оросын цэргийн тагнуулууд холбоотой гэх материалыг олон нийтэд ил болгохгүй гээд НАТО –ийн гишүүн орнуудаас дэмжлэг хүсжээ. НАТО нь Чехийн зүгээс Оросын эсрэг авч байгаа бүх арга хэмжээг дэмжиж байгаагаа мэдэгдсэн. Үүний дараа нэгэнт цагт Чехтэй холбооны улс байгуулж Чехословак нэртэй улсын бүрэлдэхүүнд багтаж явсан Словак улс холбоотноо дэмжиж байгаагаа мэдэгдээд Братислава дах Оросын Элчин сайдын яамны гурван ажилтныг нутгаасаа нэн даруй гарахыг шаарджээ.
Оросын тал Словакийн шийдвэрт харамсаж байгаагаа мэдэгдээд хариу барихаа мэдэгдсэн. Чех нь Орост ердөө тавхан дипломат ажилтан нь үлдсэн гэж мэдэгдээд байсан нь ташаа мэдээ болж таарсан. Соёлын болон худалдааны төлөөлөгчийн газруудын ажилтнуудыг оруулбал одоо Орост 50 орчим хүн ажиллаж байгаа юм байна. Тиймээс 63 хүнээ хөөлгөсөн Орост хариу барих хангалттай боломж байгаагийн дээр Словакт хариу барих болохоор Чех ба Оросын хооронд дэгдээд байсан дипломат дайн нь Чехсловак ба Орос хоорондын дипломат дайн болж ширүүсэх нь гарцаагүй болоод байна.
25°C
Сэтгэгдэл (7)