Японы Өөрийгөө хамгаалах хүчний Нисэх хүчин ба АНУ-ын Цэргийн нисэх хүчин Япон тэнгис болон Зүүн Хятадын тэнгисийн орчим хамтарсан хээрийн сургууль явуулсан байна.
Тус хээрийн сургуульд Японы зэвсэглэлд байдаг F-15сөнөөгч 13 ширхэг, F-2 сөнөөгч 2 ширхэг, АНУ-ын нисэх хүчний B-52 стратегийн бөмбөгдөгч хоёр ширхэг оролцсон байна. Токио ба Бээжин хоорондын газар нутгийн маргааны бай болоод буй Сенкаку (Дяоюйдао)арлууд нь Зүүн Хятадын тэнгист байрладаг учраас тус бүс нутагт ийм хээрийн сургууль болж байгаа нь Хятадын анхаарлыг маш ихээр татаж байгаа аж.
Түүнчлэн Японы Батлан хамгаалахын сайд Нобуо Киси нь хээрийн сургууль эхэлсэн өдөр хэвлэлийн хурал хийхдээ “Япон улс нь далай тэнгист хэрэгжүүлж байгаа БНХАУ-ын үйлдлүүдийг сэтгэл зовнин анхааралтай ажиглаж байна” гэж мэдэгдсэн юм.
Өмнө нь хувь хүний өмчлөлд байсан Сенкаку арлуудыг 2012 онд Японы Засгийн газар худалдан авсны дараанаас Хятад нь арлуудын эзэн харьяалалд онцгой анхаарал хандуулах болсон. Японы Засгийн газар маргаантай арлуудыг мэдэлдээ авсан сургаар хятадад Японыг эсэргүүцсэн том жагсаал цуглаан болж, Хятад даяар япон хоолны газрууд, Японтой хамтарсан үйлдвэрүүдийг хаах зэрэг арга хэмжээ авсан байдаг. Улмаар Хятадын эргийн хамгаалалтын усан онгоцнууд маргаантай арлуудын орчим эргүүл хийх, ойролцоох бүсэд нь санаатай зогсох зэрэг үйлдэл хийх болсон юм. Хятад нь 2021 оны хоёрдугаар сарын 1-ээс эргийн хамгаалалтын усан онгоцнуудад усан хилийн бүрэн бүтэн байдлаа хамгаалахын тулд гадаадын усан онгоц руу гал нээхийг зөвшөөрсөн хууль баталсан. Үүний хариуд Япон нь Сенкаку арлууд дээр цэрэг буулгах оролдлого хийсэн тохиолдолд зэвсэг хэрэглэх зөвшөөрлийг эргийн хамгаалалтын усан онгоцнуудаа өгөөд байгаа юм.
Сэтгэгдэл (0)
Сэтгэгдэл бичигдээгүй байна