Венесуэлийн эдийн засгийн байдал харьцангуй дээрдсэн тул ажлын хөлсний доод хэмжээг 7 сая боливар болгож нэмж байгаа тухай тус улсын Хөтөлбөрийн сайд Эдуардо Пиньяте мэдээлсэн байна. Венесуэлийн Төв банкны албан ёсны ханшаар 7 сая боливар нь 2,5 ам.доллартай дүйцэх юм байна.
Венесуэлийн удирдлага зөвхөн цалин нэмэхээс гадна 3 сая боливарын нэн тэргүүний хэрэгцээт бараа авах талон тарааж байхаар болжээ.
Сүүлийн жилүүдэд Венесуэл нь нийгэм эдийн засгийн гүн хямралд ороод байгаа юм. Зөвхөн инфляц гэхэд л 2018 онд 1,7 сая хувьд хүрч, 2019 онд 10 мянган хувьд хүрч байсан. Венесуэлийн эдийн засаг нь газрын тосны экспортоос голчлон хамаардаг, тэр дундаа дийлэнх газрын тосоо АНУ руу экспортолдог атал АНУ-ын зүгээс эдийн засгийн хориг арга хэмжээ авсан нь тус улсад маш хүнд туссан. АНУ нь Ерөнхийлөгч Трампын үед Венесуэлийн газрын тос худалдан авахаа түр зогсоосон төдийгүй бусад улс орнуудыг Венесуэлээс газрын тос авах, тус улсад хөрөнгө оруулалт хийхийг хориглосон нь маш хүнд цохилт болсон.
АНУ нь Венесуэлээс газрын тос авахаа больсноор боловсруулах үйлдвэрүүдээ өөр эх үүсвэрээс түүхий эдээр хангах ёстой болсон. Хачирхалтай нь ийм эх сурвалж нь АНУ –ын хориг арга хэмжээнд өртсөн өөр нэг улс болох ОХУ болж хувирсан. Шинжээчдийн тооцсоноор одоогоор ОХУ-аас газрын тос хамгийн их хэмжээгээр импортлогч улс нь АНУ болж хувирсан байна.
21°C
Сэтгэгдэл (4)