Хойд Солонгосын эрх баригчид Өмнөд Солонгостой хиллэдэг бүс нутагт карантины арга хэмжээг нэмэгдүүлсэн байна. Хойд Солонгосын төв хэвлэл болох “Rodong Sinmun” сониноос баасан гарагт мэдээлснээр Канвондо мужийн Косон-гун хошуунд вирус тархахаас сэргийлэх нэмэлт арга хэмжээ авсан бөгөөд иргэдэд хандан “Нутгийн иргэд анхаарал татахуйц бүх л хэрэг явдлын талаар холбогдох байгууллагуудад нэн даруй мэдээлэх ёстой” гэжээ. Улмаар корона вирусийн тараагч байж болох үхсэн амьтад, салхиар туугдаж ирсэн жирийн бус эд зүйлсийг онцгой анхаарахыг сануулсан байна.
Энэхүү яригдаад байгаа салхинд туугдан ирдэг жирийн бус эд зүйл гээч нь Өмнөд Солонгосоос тараадаг ухуулах хуудас юм байна. Энэ нийтлэл гарахаас нэг өдрийн өмнө Хойд Солонгосын удирдлага иргэддээ хандан хил залгаа нутгаас тарааж байгаа Өмнөд Солонгосын ухуулах хуудас нь корона вирусийн халдвар тарааж болзошгүй тухай анхааруулж байсан бөгөөд ингэхдээ ухуулах хуудаснуудыг “жирийн бус эд зүйл” гэж давхар нэрлэж байжээ.
Өмнөд Солонгост амьдардаг Хойд Солонгосоос зугтсан иргэдийг нэгтгэдэг төрийн бус байгууллагууд дөрөвдүгээр сарын 25-29-ний өдрүүдэд Өмнөд Солонгосын Көнгидө, Канвандо мужуудаас Хойд Солонгосын чигт 500 мянган ухуулах хуудас, 500 мянган гарын авлага, 1 долларын таван мянган дэвсгэрт бүхий 10 том агаарын бөмбөлөг хөөргөсөн байна. Ухуулах хуудас, гарын авлага нь Хойд Солонгосын эрх баригчдын шүүмжилсэн агуулгатай.
Хойд Солонгост албан ёсоор корона вирусийн нэг ч тохиолдол бүртгэгдээгүй байгаа.
Сэтгэгдэл (0)
Сэтгэгдэл бичигдээгүй байна