Хятадын Статистикийн удирдах газраас бүх хүн амын долоо дах удаагийн тооллогыг үндэслэн Хятадын эх газрын хэсэгт амьдарч байгаа хүн амын тоо 1,41178тэрбумд хүрсэн тухай мэдээлснийг “Синьхуа” агентлаг уламжилжээ.
Эдгээр 1,41178 тэрбум хүний 63,89 хувь буюу 901,99 сая нь хотын оршин суугчид байжээ. Ингэснээр Хятад нь нэлээд хэдэн жилийн өмнө зарлаад байсан хотжилтыг идэвхжүүлэх бодлогоо амжилттай хэрэгжүүлж байна гэж дүгнэж болохоор байна. 2019 онд хот суурин газар төвлөрсөн хүн ам нь нийт хүн амын 60,6 хувийг эзэлж байсан юм. Судлаачид Хятадын эдийн засгийн өсөлтийг тогтмол өндөр байлгахын тулд иргэдийг хөдөө орон нутгаас хот газар төвлөрүүлэх шаардлагатай байгааг нэлээд хэдэн жилийн өмнөөс анхааруулж байсан. Харьцуулахад Хятадыг стратегийн гол өрсөлдөгчөө гэж зарлаад байгаа АНУ-д 2020 оны байдлаар хүн амынх нь 82,7 хувь нь хот газар амьдарч байжээ.
Мөн энэ тооллогоор Хятадын эх газрын хүн ам жилд дунджаа 0,53 хувиар өсөж байгаа гэсэн дүгнэлт хийжээ. Эрэгтэйчүүд ба эмэгтэйчүүдийн харьцаа 105,7 : 100 болсон байна. Энэ бол хүйсийн тэнцвэргүй байдал бага зэрэг буурсан үзүүлэлт юм. 2010 оны бүх нийтийн тооллогоор энэ харьцаа 105,2 : 100 болж байж. Түүнчлэн 16-59 насны ажлын чадвар хамгийн өндөр бүлгийн хүмүүс 880 сая байжээ. Иймд Хятадын Статистикийн удирдах газрын тэргүүн Нин Цичжэ нь БНХАУ-д ажлын хүч хангалттай их байна гэж мэдэгдсэн байна.
Сэтгэгдэл (0)
Сэтгэгдэл бичигдээгүй байна