Германы Гэр бүлийн хэрэг эрхэлсэн сайд Франциска Гиффей нь эрдмийн цол хамгаалах диссертац бичихдээ бусдын бүтээлээс дурдалгүйгээр дураар авсан гэж буруутгагдсан тул намынхаа нэр хүндийг сэвтүүлэхгүй гэсэндээ сайдын суудлаасаа сайн дураар бууж байгаагаа мэдэгджээ. Энэ тухай Германы Канцлер Ангела Меркель мэдэгдсэн байна. Тэрээр “Шинжлэх ухаан-судалгааны уулзалт-2021” форум дээр үг хэлэхдээ “Францска Гиффей нь өнөөдөр сайд нарын танхимын хуралдааны үеэр надад хандан албан тушаалаас нь чөлөөлж өгөх хүсэлтийг ХБНГУ-ын Ерөнхийлөгчид тавихыг хүссэн” гэжээ.
Сайдыг докторын зэрэг хамгаалсан ажилдаа бусдын шинжлэх ухааны бүтлээсээ нэр дурдалгүй авсан, өөрөөр хэлбэл хулгай хийсэн эсэхийг Берлиний Чөлөөт их сургуулийн эрдмийн зөвлөл авч хэлэлцээд эрдмийн ажилд нь алдаа байгаа ч цол зэргийг нь хураах шаардлагагүй гэж үзсэн. Гэвч Гиффей нь цаашид намын нэр хүндийг сэвтүүлэхгүйн тулд докторын цолноосоо татгалзаад байсан бол удалгүй ийнхүү сайдынхаа тушаалаас сайн дураар бууж байгаа юм байна.
Олон нийтэд нээлттэй байгаа шинжлэх ухааны бүтээлүүдэд бусдын ажлаас зөвшөөрөлгүй авсан зүйлс байгаа эсэхийг нягтлан шалгадаг “VroniPlag Wiki” сайтын хэрэглэгчид эрхэм сайдын эрдмийн ажилд шинжилгээ хийгээд 200 нүүр бүтээлээс нь 49 нүүрэнд нь жинхэнэ зохиогчийг дурдаагүй, холбоосыг заагаагүй үгэн болон утгын санааг нь зээлдэн авсан бичвэр байна гэж дүгнэсэн нь маргааны эхлэл болсон байна.
Германд иймэрхүү зэмлэлд туйлын хариуцлагатай ханддаг бөгөөд холбооны Канцлер Меркель нь Гиффей сайдыг “маш чухал бөгөөд бат бэх амжилтад хүрсэн” гэж үнэлсэн, их сургуулийн зөвлөл эрдмийн цолыг нь хурааж авах шаардлагагүй гэж үзсэн ч улстөрч нь ийнхүү судлаасаа огцорч, дараагийн хүмүүст байраа тавьж өгчээ.
Сэтгэгдэл (0)
Сэтгэгдэл бичигдээгүй байна