Бразилийн Манаус нэртэй сая гаруй хүн амтай хотын амьдрал сүүлийн хэдэн өдрийн турш зогсонги байдалд орж, оршин суугчид нь гэрээсээ гарахгүй болсон тухай “The Guardian” сонин бичсэн байна. Яагаад гэтэл цагдаа нар тусгай ажиллагаа явуулах үеэр тус хотод бүгсэн хар тамхины мафийн босс “Дадиньно” хочтой Эрика БатистуКосту гэгчийг устгасан байна. Үүний хариуд түүний гар хөл болсон хүмүүс хотын удирдлагын эсрэг дайн зарлажээ. Тэд цагдаагийн газрууд, хотын мэдлийн, үйлчилгээний төвүүд рүү дайрч, нийтийн тээврийн автобус, хотын оршин суугчдын хувийн машиныг зогсоож шатааж, галдаж эхэлсэн байна. Ийм балмад үйлдлээс болж хотын удирдлагууд сургууль, корона вирусийн эсрэг вакцин хийх төвүүд гэх мэт хүн олноор цугладаг газруудыг хааж эхэлсэн байна.
Хөл хорио нь хар тамхи түгээх тогтсон зам харилцааг хааж, үнийг өсгөснөөр түүнийг наймаалдаг мафийнхан асар их ашиг олох болж, зарим газар энэ мэт эрээ цээргүй аашлах болжээ. Үүнээс өмнө гуравдугаар сард Италийн мафийн бүлэглэлүүд давраад түргэний машин, цагдаагийн машиныг тусгай дуут болон гэрлэн дохиолол ашиглахыг хориглож, ашиглавал шийтгэнэ гэж сүрдүүлэх болсон хэрэг гарч байжээ. Түргэний тэрэг тусгай дуут дохио дуугарган давхихаар үйлчлүүлэгчид нь айж зугтаад хар тамхиа борлуулж чадахгүй их алдагдал хүлээх болсон ийм сүрдүүлэн тараасан гэнэ. Сүүлд гэхэд л Неаполь хотод дуудлагаар явж байсан түргэний машиныг мотоцикл унасан зэвсэгт этгээдүүд сүрдүүлж байгаад дуут дохиог нь унтраалгаж, ахин тэдний дүүргээр дуут болон гэрлэн дохиотой явбал ална гэж сүрдүүлжээ.
Сэтгэгдэл (0)
Сэтгэгдэл бичигдээгүй байна