УБТЗ-ын албаны дарга Ж.Пунцагийг яллагдагчаар татжээ

АТГ-ын Мөрдөн шалгах хэлтсийн мөрдөгчид энэ сарын 19-нд “УБТЗ”-ийн Дотоод аудит, хяналт шалгалтын албаны дарга Ж.Пунцагийг баривчилжээ. Ж.Пунцаг нь албан тушаалын эрх мэдлээ хэтрүүлэн ашиглаж, бусдад давуу байдал олгосон, авлига авсан байж болзошгүй. Түүнийг 48 цагаар түр саатуулаад суллажээ. Учир нь, АТГ-аас Ж.Пунцагийг үргэлжлүүлэн хорих санал явуулсан ч шүүх “...Цагдан хорих таслан сэргийлэх арга хэмжээ авахгүйгээр гадуур шалгаж болно” гэж шийдсэн байна. Улмаар АТГ-ын мөрдөгчид Ж.Пунцагт эрүүгийн хэрэг үүсгэж яллагдагчаар татжээ.

 Хэвлэл мэдээлэл, олон нийттэй харилцах албаны ажилтан, комиссар Н.Тэмүүлэн: 

-Авлигатай тэмцэх газрын Мөрдөн байцаах хэлтсээс "УБТЗ" хувь нийлүүлсэн нийгэмлэгийн Дотоод аудит, хяналт шалгалтын албаны орлогч дарга Ж.Пунцагийг мөрдөн шалгаж, хуульд заасан үндэслэл нь тогтоогдсон тул 48 цаг цагдан хорьсон. Хэрэг хянан шийдвэрлэх тухай хуулийн дагуу хойшлуулашгүй үйл ажиллагаагаар баривчилж, давхар мөрдөн шалгасан. Энэ хүнд холбогдох үйлдэлд эрүүгийн хэрэг үүсгэж, яллагдагчаар татах саналыг прокурорын байгууллагад хүргүүлсэн. Уг саналыг прокурор үндэслэлтэй байна гэж үзсэн учраас түүнийг мөрдөн шалгаж байна.