“Хөгжлийн банкны зээлийн асуудлыг АТГ-т шилжүүлэх” шийдвэр гарчээ

БСШУ-ны сайд асан Ё.Отгонбаярын эхнэрийн хамааралтай компани Хөгжлийн банкнаас 17,7 тэрбум төгрөгийн зээл аваад, эргүүлж төлөөгүй тухай мэдээлэл гаргасан. 

Сайд асан Ё.Отгонбаяр сэтгүүлчдийн амь насанд заналхийлсэн асуудлаар  сэтгүүлч У.Оргилмаа, Н.Өнөрцэцэг, Ч.Лодойсамбуу, Г.Мөнхтуул, Ж.Мядагбадам, Н.Баасандамба, Ч.Доржбат нар мэдээлэл хийсэн юм.

 “Хөгжлийн банкны зээлтэй холбоотой бүх асуудлыг АТГ-т шилжүүлэх шийвэр”- ийг Ерөнхий сайд Л.Оюун-Эрдэнэ гаргасан аж. Энэ талаар удахгүй албаны хүмүүс мэдээлэл хийнэ гэх мэдээлэл байна.

Эргэн сануулахад Хөгжлийн банкны найдваргүй зээлдэгчдийн талаар бид цуврал болгон мэдээлж байгаа билээ.  БСШУ-ны сайд асан Ё.Отгонбаярын эхнэрийн хамаарал бүхий компани Хөгжлийн банкинд 17.7 тэрбум төгрөгийн өртэй, найдваргүй зээлдэгчдийн жагсаалтад багтаж байгааг мэдээллэсэн. Үүний хариуд Ё.Отгонбаяр нь “Би хүнтэй суухдаа ах дүү чинь зээлтэй юу гэж асуух ёстой байсан уу?” гэж өөрийн твиттер хуудсандаа бичээд байсан юм. Тэрбээр өөрийн албан ёсны твиттер хуудсаараа сэтгүүлчийг ална гэж сүрдүүлсэн захидал илгээсэн тухай сэтгүүлч У.Оргилмаа дэлгээд байгаа билээ. Уг захидалд “Та хоёроос болж салж байна, чамайг олж ална. Миний амьдралыг алсан бол хариугаа авна. Заригтай чинь хамт ална. Үнэн хорсож байна. Нэгэнт тануус тэгж байгаан бол алалцана” хэмээн сэтгүүлчдийн амь насанд заналхийлээд байсан юм.