Хүдэр суманд алт олборлогч “Алтан төхөм" компанийг нөхөн сэргээлт хийгээгүй гэх үндэслэлээр ЦЕГ-аас шалгаж байна

Сэлэнгэ аймгийн Хүдэр суманд алт олборлогч "Алтан төхөм" гэх компанийн алт олборлохоор ухсан нүхэнд үүссэн хиймэл нууранд өнгөрсөн жилийн наймдугаар сард 13 настай хүүхэд живж амиа алдсан. Хүүг живсэн газраас хэдхэн алхамын зайд "Алтан төхөм" компани үйл ажиллагаа явуулж байгаа нөхцөл байдлыг бид сурвалжилсан.

Нутгийн иргэдийн хэлж байгаагаар тухайн компани нь 2016 онд алт олборлолт явуулж, газар сэндийчсэн ч нөхөн сэргээлт огт хийгээгүй талаар мэдээлж байгаа юм. Мөн голын ай саваас 50 метрийн зайд үйл ажиллагаа явуулах ёстой гэх хуулийн хэрэгжилт хангагдахгүй, Жалгын голын тархинаас хэдхэн метрийн зайд үйл ажиллагаа явуулж өрөмдлөг хийж байгаа юм. 

Сэлэнгэ аймгийн Хүдэр сумын Жалгын гол нь байгалийн үзэсгэлэн бүрдсэн ой мод, гол бүхий газар. Харамсалтай нь тус газарт алт олборлолт явуулж байгалийг сүйтгээд буй.

Алт олборлогч "Алтан төхөм" компанийг нөхөн сэргээлт хийгээгүй гэх үндэслэлээр Сэлэнгэ аймгийн Цагдаагийн газраас өнгөрсөн оны 11 дүгээр сараас эхлэн шалгаж байгаа аж. Бид уг асуудлаар үргэлжлүүлэн сурвалжилга, мэдээлэл бэлтгэн хүргэх болно.