П.Баяртүвшин: Үр хүүхдүүд минь эрүүл, саруул хамтдаа байгаа нь л надад “жаргал”

Амьдралын бартаа бүрт алдахгүйг, хүнд өвчний өмнө өвдөг сөхрөхгүйг хичээн амьдарч буй залуу гэр бүлийг та бүхэндээ онцлон хүргэж байна. С.Эрдэнэтайван, П.Баяртүвшин нар дөрвөн хүүхэдтэй. Саяхан эхнэр нь МУ-ын Ерөнхийлөгч У.Хүрэлсүхээс алдарт эхийн одонгоо гардан авсан. Энэ үеэрээ тэрбээр Ерөнхийлөгчтэй зураг авхуулахдаа гараараа зүрх хийж авхуулсан нь олны анхаарлыг татаад байгаа юм.

С.Эрдэнэтайван, П.Баяртүвшин нарынд анх ороход л хоррондын харилцаа, гэр бүлийн уур амьсгал нь халуун дулаахан санагдаж байсан юм. Нөхөр нь ажлын шаардлагаар 14 хоног гэр бүлээсээ тусдаа байдаг. Энэ үед гэр бүлийнхээ бүхий л ар талыг эхнэр нь зохицуулдаг байна. Гэр бүлийн дунд асуудал тулгарах бүрт хүүхүүдийнхээ өмнө маргалдахгүй гэж хоорондоо ярилцжээ. 

 Хүүхэд нь хавдар гэх оноштой бол эцэг эхчүүд минь тэвчээртэй, хүчтэй байгаарай хэмээн тэд захилаа. Учир нь том хүү нь анх 2017 онд цусны хорт хавдраар оношлогдсон. Хорт хавдар гэдэг үгийг анх сонсоход итгэхийн аргагүйгээр хүнд байсан ч даваад ард нь гарахаас өөр сонголт үлдээгүй хэмээн тэд нулимс дуслуулан ярина. Одоо хүү нь хичээлдээ явж, энэ өвчнийг ялан дийлсэн гэдэг итгэлтэйгээр тэдний гэр бүл ирээдүй өөд тэмүүлэн амьдардаг. Хорт хавдрыг ялан дийлсэн хүүхдэд  "эрэлхэг баатар"-ын тэмдэг гардуулдаг байна. Хүнд өвчнийхөө ард гарсан Сайн-Амар хүүгийнхээ нэрийг өөрчлөн Сайнбаатар болгожээ.