УЕПГ-аас БНСУ-д амиа алдсан залуугийн хэрэгт хамтран ажиллах хүсэлтийг БНСУ-ын Дээд прокурорын газарт хүргүүлжээ

БНСУ-д ажиллаж, амьдарч байсан Монгол Улсын иргэн бусдад зодуулж, нас барсан байж болзошгүй хэргийг тус улсын хууль хяналтын байгууллагаас хангалттай сайн шалгахгүй байгаа тухай мэдээлэл олны анхаарлыг татаад буй. Ажилласан цалин хөлсөө авч чадаагүй, ажил олгогч нарын гурван хүнд зодуулж нас барсан байж болзошгүй түүний цогцсыг гэрээс нь 20 гаруй хоногийн дараа олсон талаар талийгаач залуугийн эгч олон нийтийн сүлжээнд нийтэлсэн юм.

Уг харамсалтай хэргийн талаар Улсын Ерөнхий прокурорын газраас БНСУ-ын Дээд прокурорын газарт хандаж, албан захидал илгээжээ. Тодруулбал, Монгол Улсын иргэн А.Д нь 2021 оны 6 дугаар сарын 29-ний өдөр БНСУ-ын Умард Чүнчон мужийн Ымсон хот дахь гэртээ нас барсан байдалтай олдсон хэргийн мөрдөн шалгах ажиллагаанд анхаарч, дэмжлэг туслалцаа үзүүлэн хамтран ажиллахыг хүсэлтийг хүргүүлсэн байна.