ХХЕГ: Амиа алдсан цэргийн сэтгэл зүйн байдал тогтвортой байсан, урьд нь ямар нэгэн зөрчил гаргаж байгаагүй

2022 оны I ээлжээр хилийн цэргийн 0245 дугаар ангид татагдаж,  малын суурьт үүрэг гүйцэтгэж байсан 19 настай байлдагч С нь 2022 оны есдүгээр сарын 29-ний 13.00 цагийн орчимд модноос боомилсон байдалтай олдсон харамсалтай хэрэг гарсан. Энэ талаар бид ХХЕГ-аас тодрууллаа. 

Байлдагч нь 2022 оны есдүгээр сарын 28-ны 16.00 цагийн орчимд үхрээ хайх зорилгоор малын сууриас морин уналгатай хөдөлсөн бөгөөд 17.30 цагийн үед малаа хайж байгаа талаар мэдээллээд дахин холбоо бариагүй тул 20.00 цагаас хилийн салбараас бүлэг гаран эрэн хайх ажиллагааг эхлүүлж, 09 дүгээр сарын 29-ний 13.00 цагийн үед хилийн салбараас 8 км, малын сууриас 12 км-т  орших  "Боомын гаталга" нэртэй газар модноос боомилсон байдалтай олсон тухай хэллээ. 

Амиа алдсан цэргийн хувьд сэтгэл зүйн байдал тогтвортой. Урьд нь ямар нэгэн хэрэг, зөрчил гаргаж байгаагүй. Ахлагчтайгаа нэг цэргийн хамт гурвуул малын суурьт үүрэг гүйцэтгэж байсан. Ар гэрийн зүгээс байлдагчийг амиа хорлосон эсэхийг эцэслэн тогтоогоогүй байхад ийм мэдээлэл явж байгаад харамсаж байгаагаа бидэнд илэрхийлсэн. Уг хэргийг цагдаагийн байгууллага шалгаж байгааг хэллээ.