Ахмад настан, сургуулийн сурагчдын зорчдог ганц зам нь автомашин зөрөх боломжгүй болжээ

Баянзүрх дүүргийн 20, 33 дугаар хорооны нутаг дэвсгэрт нэгэн хувийн хэвшил өмчлөх эрхийн гэрчилгээтэй газартаа буюу хоёр айлын газарт хашаа хатгаж эхэлжээ. Хэдийгээр Гачууртад байрлах уг газар нь өмчлөх эрхтэй ч Нийслэлийн Ерөнхий боловсролын 85 дугаар сургуулийн сурагч, эцэг эхчүүд, өрхийн эмнэлэг, хороогоор үйлчлүүлэх хүүхэд, хөгшдийн ганц зорчдог уг замыг хоёр автомашин зөрж өнгөрөх байтугай явган зорчигч хөдөлгөөнд оролцох боломжгүй нөхцөлд хүрсэнд дүүргийн иргэд ихэд бухимдалтай байна.

Нийслэлийн Ерөнхий боловсролын 85 дугаар сургуульд энэ хичээлийн жилд 1000 гаруй сурагч суралцдаг мөн өдөр бүр уг замаар сурагчид болон ахмад настан зорчдог байна. 

Иймд хүүхдүүдээ эрүүл, аюулгүй орчинд сурч боловсрох Үндсэн хуульд заасан эрхээ эдлэх нь зүйтэй хэмээн эцэг эхчүүд хүчтэй эсэргүүцэж, уг асуудлыг холбогдох байгууллагуудад уламжлаад байгаа аж.