Хөнгөн атлетик: Сүүлийн өдөр 4 медаль авлаа

Зүүн Азийн залуучуудын наадмын хөнгөн атлетикийн тэмцээн өнөөдөр Налайх дүүрэгт болсон эмэгтэй 3000м, эрэгтэй 5000м-ийн кросс гүйлтийн уралдаанаар өндөрлөлөө.

Зориулалтын тартан замд биш, задгай талбайд уралддагаараа онцлогтой кросс уралдаанаас Монголын тамирчид 2 мөнгө, 2 хүрэл медаль хүртэв.

Эмэгтэйчүүдийн 3000м-т Японы Момоко Ямада 11:10.05 минутын амжилтаар түрүүлж, Монголын М.Мөнхжин 12:33.83 амжилтаар удаалав. Хүрэл медалийг Х.Уранжаргал 16:14.84 үзүүлэлтээр хүртсэн юм.

Эрэгтэйчүүдийн 5000м-т мөн Японы Даики Сасаки 16:50.92 минутын амжилтаар өнгөлж, Монголын Э.Чингүнэ (19:20.43), С.Алтансүх (20:03.85) нар мөнгө, хүрэл медаль хүртлээ.

Ийнхүү манай хөнгөнийхөн Зүүн Азийн залуучуудын наадмыг 3 мөнгө, 5 хүрэл, нийт 8 медаль хүртсэн амжилтаар өндөрлүүлж байна.