П.Сайнзориг: "Б" сорьцын хариу албан ёсоор ирсний дараа шаардлагатай арга хэмжээг авна

Улсын арслан М.Бадарч өчигдөр цахим хаягтаа допингийн шинжилгээний хариутай холбоотой мэдээлэл оруулсан. Ингэхдээ допингийн шинжилгээний захиалагч тал болох Хууль зүй дотоод хэргийн яамны Бөхийн салбар хорооны удирдлагууд мэдээллийг хууль журмыг илтээр зөрчсөн гэх утгатай мэдээлэл оруулсан. Харин уг асуудлаар хариу тайлбарыг ХЗДХ-ийн яамны Төрийн нарийн бичгийн дарга П.Сайнзориг хийжээ.

ХЗДХ-ийн яамны Төрийн нарийн бичгийн дарга П.Сайнзориг : " Ичсэн, бантсан хүн юу гэдэг билээ ийм зүйл болж байна. Допингийн шинжилгээг ХЗДХЯ авдаггүй, шинжилгээний хариу ч тус яаманд шинжилгээ хийсэн лабораториос шууд ирдэггүй. Допингийн эсрэг үндэсний төв сорьцыг авч, холбогдох олон улсын лабораториос тус төвд ирсэн шинжилгээний хариуг журамд заасны дагуу Үндэсний их баяр наадмыг зохион байгуулах хорооны салбар хороо болох Үндэсний бөхийн салбар хороонд ирүүлдэг бөгөөд салбар хороо тухайн бөх болон олон нийтэд мэдээлдэг болно. Допингийн шинжилгээ авах үйл явц болон хүргэх үйл ажиллагаанд энэ жил тасралтгүй хууль хяналтын байгууллага хяналт тавьсан. Баримт байвал гаргаж ирээд харуулах хэрэгтэй, ховоор бас зохиож олон нийтийг төөрөгдүүлэх хэрэггүй болов уу. Хууль тогтоомжийн хүрээнд чиг үүргээ хэрэгжүүлж буй байгууллага, алба хаагчдыг баримтгүйгээр ташаа мэдээлэл тараах замаар өөрийн хариуцлагагүй байдлаа бусдад нялзааж гэмгүй царайлмааргүй байна.  “Б” сорьцын хариу албан ёсоор ирсний дараа хууль тогтоомж, холбогдох дүрэм, журамд заасны дагуу олон нийтэд мэдээлэх бөгөөд шаардлагатай холбогдох арга хэмжээг авна. Цаашид наадмын бөхийн барилдаанд шөвгөрч цол хүртсэн бөхөд батламж олгож, допингийн шинжилгээний хариу ирсний дараа цол олгуулах саналаа Ерөнхийлөгчид уламжилдаг байх шаардлагатай болов уу даа" гэжээ.