АУДИТЫН ДҮГНЭЛТ: Эрсдэлд орсон төрийн гэх 264.3 тэрбум ба Чингис хаан банк, Үндэсний хөрөнгө оруулалтын банк

Мөнгө, эрх мэдэлд ойр хүмүүс нийлж банк дампууруулж баяждаг танил технологи хэрэгжсээр байна. Үүний нэг Чингис хаан банк. Тус банкны хувьцаа эзэмшигчид нь өөрсдөө банкныхаа чанаргүй зээлдэгчид болсныг АТГ шалгаж байсан нь саяхан. Үүний араас Хөгжлийн банкны чанаргүй зээлдэгч нарын жагсаалтад багтаж байгаа нь ч ил болсон юм. Тодруулбал, Чингис банк нь Хөгжлийн банкнаас 38.5 тэрбум төгрөгийн зээл авчихаад нэг ч төгрөгийн хүү болон буцаан төлөлт хийгээгүй юм. Тэгвэл энэ удаа тус банкинд байршиж байсан төрийн мөнгө эрсдэлд орсон нь аудитын дүгнэлтээр ил болоод байна. 

Засгийн газрын 2021 оны санхүүгийн нэгтгэсэн тайланд хийсэн аудитын дүгнэлт: Монгол банкнаас тогтоосон банкны үйл ажиллагааны зохистой харьцааны шалгуур үзүүлэлтийг хангаагүй Үндэсний хөрөнгө оруулалтын банк, Чингис хаан банканд байршиж буй 264.3 тэрбум төгрөгийн мөнгөн хөрөнгөд эрсдэл үүссэн байна.

Аудитын дүгнэлтэд, Үндэсний хөрөнгө оруулалтын банк, Чингис хаан банканд байршиж буй 264.3 тэрбум төгрөг эрсдэлд орсон гэжээ. Чингис хаан банкны үзүүлэлт 2019 оноос буурсан байтал тус банканд төрийн мөнгийг байршуулах нь хэний сонирхол байсан эсэх нь анхаарал татна. Дүгнэвэл, нэгдүгээрт, Төрийн тодотголтой мөнгийг банкны үзүүлэлт нь огцом буурсан банканд байршуулсан, хоёрдугаарт, тухайн мөнгийг банкны хувьцаа эзэмшигчид болон нэр бүхий гишүүд хувааж аваад эргэн төлөлт хийгээгүй зэрэг асуудал энд бий. Улмаар банк эргэлтийн хөрөнгөгүй болж дампуурах эрсдэлд орж байна гэсэн үг. Эцэст нь төрийн, иргэдийн мөнгө салхинд хийсэх асуудал яригдах болж байна.