Талийгаач бүсгүйн цогцосыг тоносон хэргийг ЭЦА-наас шалгаж эхэллээ

Хүүхдүүдээ сургуульд өгөөд, өөрөө тухайн сургуульдаа үйлчлэгчээр ажилладаг байсан 30 настай өрх толгойлсон С.Алунгуа бүсгүй 8-р сарын 6-нд хороололд явж байгаад машинд дайруулаад амиа алдсан. Нэгэнт амиа алдсан учир ар гэрийнхэн нь бусдад амьдрал бэлэглэнээ гээд талийгаачийн хоёр бөөр, элэгийг шилжүүлж авахыг зөвшөөрчээ. Талийгаачийн цогцсыг эмнэлгээс гэртээ аваад ирэхэд хөлийн өвдөг, шагайг нь мөн зүсээд өөр эд эрхтэнгүүдийг нь аваад “малын мах жиргэсэн” мэт болгосон байсныг хараад ар гэрийнхэн нь гомдолтой байгаа юм. Осолд орохдоо тархиндаа гэмтэл авсан, элэг бөөрийг нь авахдаа цээж, хэвлийг нь зүсэх байтал өвдөг, шагайг нь зүсээд цаас үдсэн мэт оёод орхисон байсан талаар мэдээлсэн.

Талийгаачийн элэг, бөөр, шөрмөсийг авна гэж зөвшөөрлийн хуудсан дээр ар гэрээр нь гарын үсэг зуруулсан ч шөрмөс, тойгны ясны холбоос, хоёр хөлний тойгны яс, дунд чөмөгний булуу яс, шаант, ясны бурзан, дунд чөмөг, доод булуу, шилбэний урд шөрмөс, борвины шандас, борвины шөрмөсийг аваад сүүн уусмалаар дүүргэсэн байсан талаар мэдээлсэн. Тэгвэл С.Алунгуа бүсгүйн цогцосыг тоносон уг хэргийг Эрүүгийн цагдаагийн албанаас шалгаж эхэлжээ.