Б.Шаравдорж: Гэр бүл салаад охин минь “аавтайгаа амьдарна” гэхэд нь архинаас гарч, ажилд ороод хоёр хүүхдийнхээ төлөө амьдарсан

“Ах нь Зүүнхараагаас хотод орж ирээд арван хэдэн жил болж байна. Гэр бүл минь бутрахад бага охин “аавтай хамт амьдрана” гэхэд нь би архи амсахаа больсон. Тэр үед хүү, охиноо аваад хот руу орж ирсэн. Барилгын ажил хийж охин, хүүгээ дээд боловсролтой болгохын тулд хуруу хумсаа хугалан барин зүтгэсэн. Одоо бол хоёр хүүхэд маань хоёулаа амьдрал зохиож, ажлын байртай болсон. Бага охиныхоо гурван настай хүү, ханьтай нь хамт сайхан л амьдарч байна. Зээ хүү минь шулганаад л зайрмаг нэхэх ч аз жаргал юм. Ахынх нь зорилго бол сайхан байшин барьчихаад дунд гарын жийптэй болох. Тэгээд хүүхдүүдээ аваад төрсөн нутаг Өвөрхангай аймгаараа аялах”. Ярилцаж дуусаад “зээ минь даарчихлаа” гээд галаа түлэнгээ үргэлжлүүлэн хууч хөөрнө. Хүүхдүүдээ ярихдаа нүд нь гэрэлтэж байв. Энгийн сайхан мөрөөдөлтэй хүнтэй ярилцав.