Осолд орсон охины аав: Охин маань талийгаач охинтой цэцэрлэгээсээ найзалсан, одоо найзынхаа зургийг харж орилоод сэтгэл санаа нь хүнд байна

Сургуулийнхаа урд, гарцан дээр хоёр сурагч машинд дайруулж нэг нь газар дээрээ нас барсан осол гарсан. Тодруулбал, 12-13 насны хоёр сурагч сургуулийнхаа урд гарцан дээр машинд дайруулж нэг нь газар дээрээ нас барж нэг нь  ГССҮТ-д хүргэгдсэн билээ. 

Тэгвэл осолд орсон 13 настай охины ааваас нь охины биеийн байдал ямар байгаа талаар тодрууллаа. Тэрбээр "Охин маань талийгаач охинтой цэцэрлэгээсээ найзалсан, одоо найзынхаа зургийг харж орилоод сэтгэл санаа нь хүнд байна. Миний охины хамар, хөл, тойгны яс хугарсан, гар нь хөдөлж чадахгүй байгаа, баруун хөлний шагайн хавчаар яс хугарсан байна. Одоог хүртэл шокноосоо гарч чадахгүй байгаа , сэтгэл зүйчтэй уулзуулах гээд байж байна гэх мэдээллийг өгч байна.

Ослын улмаас гэмтсэн охины биеийн байдлын талаар Гэмтэл Согог Судлалын Үндэсний Төв(ГССҮТ)-өөс мэдээлэл авахад "Тухайн хүүхэд ГССҮТ-ийн Хүүхдийн гэмтэл согогийн тасагт хэвтэн эмчлүүлж байна. Баруун хөлний шагайн хавчаар яс хугаралттай гэсэн оноштойгоор эмнэлгийн тусламж үйлчилгээ авч байгаа. Манай төвөөс шаардлагатай нарийн шинжилгээ оношилгоог хийж байна. Хүүхдийн биеийн байдал тогтвортой байгаа" гэх мэдээллийг өгсөн юм.