Солонготын даваагаар автомашин зорчих боломжгүй болжээ

Онцгой байдлын ерөнхий газарт Завхан аймгийн Их-Уул сумын Цэцүүх багийн нутагт Цэцэрлэг-Тосонцэнгэл-Нөмрөг чиглэлийн Солонготын даваа / Тосонцэнгэл сумын төвөөс зүүн урд зүгт 90 км, сумын төвөөс зүүн урд зүгт 45 км/-д цас орсны улмаас авто замын зорчих хэсэгт халтиргаа гулгаа үүсэж автомашин зорчих боломжгүй болсон дуудлагыг 11.01-ний өдрийн 16:40 цагт хүлээн авсан байна. Тус аймгийн Онцгой байдлын газрын даргын шийдвэрээр Тосонцэнгэл сум дахь Гал түймэр унтраах, аврах 39 дүгээр ангийн алба хаагчид 90 км замыг туулан 19:20 цагт очиж замын цасыг хусаж, шороо асган 4 цаг 41 минут ажиллаж нийт 9 автомашин, 10 зорчигчийг даваанаас аюулгүй буулгасан байна.

Мөн Завхан аймгийн Засаг даргын Тамгын газраас мэдээлснээр Солонготын давааны 2023 оны 11 дүгээр сарын 2-ний өдрийн өглөөний 08:00-09:00 цагийн нөхцөл байдлаар халтиргаа гулгаа ихтэй байна. "Завхан АЗЗА" ТӨХК-аас үзлэг шалгалтыг тогтмол хийн ажиллаж байгаа бөгөөд шороо асгах, давс цацах ажлууд хийгдэж байгаа юм байна. Мөн Завхан- Улаанбаатар чиглэлд зорчиж байсан ачаа тээврийн 2 автомашин Солонготын даваа өгсөх замд саатсаныг гаргах, тээврийн хэрэгсэл саадгүй явах нөхцөлийг бүрдүүлэхээр ажиллаж байна гэсэн мэдээллийг өгөв.