Талийгаачийн 10 настай охин: Ааваа хоёулаа амьдарна даа

Хөдөөд малчдын түгээмэл унадаг пробокс маркийн автомашинаар гэр рүүгээ зүтгэсэн саахалт айлын хоёр малчин бүсгүй хоёулаа цасан шуурганаар эндлээ. "Машин нь цасанд суучихлаа" гээд хоёул машинаасаа буугаад гэрийнхээ эсрэг зүг алхчихаж. Уг нь гэрээсээ 200-хан метрийн зайд байжээ.

 Цасан шуурга нүүр нүдгүй шуурч байсан учир машин тэрэг эрж хайж чадалгүй хугацаа алдаж, хоёр бүсгүйн цогцсыг цасанд суусан машинаас нь 800 метрийн зайд уулын бэлээс олжээ. Талийгаач Т нь 10, 22, 28 насны гурван хүүхэдтэй, 90 нас гарсан өндөр ээжтэй, эхээс 9-үүлээ байв. 

Биднийг гэр рүү ороход яагаан дээлтэй, үсээ гөлчийтөл самнасан 10 настай бага охин утас ширтэнэ. 90 нас  гарсан ээж нь гар дахь эрхийг хурдан хурдан эргүүлнэ. 

Талийгаачийн эгч нар бололтой настайвтар эгч нар "Өнөрөө бид нар адилхан байна уу" гэж асуун сулхан инээмсэглэж хэсэг сатаарахыг оролдож буй нь илт.

Бага охин болж буй үйл явдлыг гадарласан нь илт, "Ааваа хоёулаа амьдарна даа" хэмээн аавыгаа аргадангуй хэлэх нь хэрсүүхэн. 

Саяхан л бүтэн байсан гэр бүл хагас болчихно гэж хэн, хэн нь үл мэдэх билээ. 

Талийгаачийн ар гэрт гүн эмгэнэл илэрхийлье.