Өрхийг бүтээж цэнхэр хаалгыг нь урт бор банзаар чагтлан хаасан гэр хашааны баруун үзүүрт харагдана. Харин хашааны зүүн хойно гэрэл нь асаалттай, хүмүүс бужигналдаж, тооноор нь уур савссан гэрт биднийг орохыг урьж нэг эрэгтэй гарч ирэв.
Энэ айл бол Төв аймгийн Эрдэнэсант сумын малчин “Д”-гийнх. Гэрт ормогц “Ум мани бадмэ хум” гэдэг радиод хураасан дуу чихэнд тод сонсогдоно. Гэр тойрон суух хүмүүс "Та хэд дээшээ суу" хэмээн хүндлэн, эелдгээр хандана. Гэрийн зүүн хойморт шар дээлтэй, санчигний үс нь бууралтаж, нүдэнд нь харуусал хурсан 50 гаруй насны эрэгтэй эрхи эргүүлэн “Ум мани бадмэ хум” хэмээн аяар шивнэн, сууна. Энэ эрэгтэй бол талийгаач Б-гийн нөхөр.
Бор цамц өмссөн алаг нүдтэй, царайлаг охин гэрээр орж, гарч байсан нь талийгаачийн охин аж. Талийгаачийнх 16 настай охин, 29 настай хүүтэй. Малчин Б бүсгүй эхээс есүүлээ, бужигналдан өсчээ. Даанч тэрээр өнгөрөгч хагас сайны өглөө найзтайгаа хамт пробокс машинаа унаж хонио эргэхээр гараад хоёулаа эргэж ирээгүй. Тэд гэрээсээ 200-хан метрийн зайд машинаа орхиод, гэрийн зүг алхсан ч машинаасаа 800 метрийн цаана осгож, нас барсан байдалтайгаар олджээ.
Та хэдэд гомдол, санал бий юу гэхэд “Бид уг нь өглөөний 10 цагийн үед Онцгойд дуудлага өгсөн ч 14 цагийн үед ирсэн. Хөөрхий тэд бас цастайгаа зууралдсаар оройтсон байх. Хоёр талийгаач маань гэртэйгээ ойрхон ирчихлээ гэж машинаасаа буухдаа чигээ л алдчихсан юм шиг байгаа юм. Гэр нь урд зүг рүү байхад уул тал руу алхаад 800 метрийн цаанаас хоёулаа олдсон. Тэдний нас барсан газартай маш ойрхон айл байсан, жаахан л тэссэн бол..." гэж хэлээд бүгд чимээгүй болов.
Энэ зуур гэрт хүмүүс нэмэгдэн ирж, бүгд тойрон зогсоно. Талийгаач эмэгтэйн эгч гэх намуухан хоолойтой, нүдэнд дулаахан царайтай 60 орчим насны эмэгтэй эрхи эргүүлэнгээ “Сэтгүүлч Өнөрөөг бид хэд дэмждэг, ирсэн дээр нь бидэнд хэлэх зүйл байна" гэв.
Ар гэрийнхэнд нь эвгүй санагдсан зүйл бол "Осгоод нас барсан нь тодорхой байхад талийгаачид 24 цаг задлан шинжилгээ хийж, гэрийнхэнийг нь огт оруулаагүй. Талийгаачид задлан шинжилгээ хийсэн нь хэцүү байсан" хэмээн ярилаа.
Удалгүй талийгаачийн ах “Манай сум утасны сүлжээ сайтай байсан бол өдийд ийм харуусал тохиолдохгүй байлаа. Сумын төвөөс 30-хан км газарт ямар ч үүрэн телефоны сүлжээ барьдаггүй. "Тагь" хайрханд нэг антенитай болчихвол Атар, Лүн, Эрдэнэсантын малчид сүлжээтэй болчихно. Дүү маань найзтайгаа хоёулаа утастай явсан ч сүлжээ байгаагүй. Утас нь сүлжээтэй байсан бол холбоо бариад л тусламж авчихна шүү дээ" гэж харамсан хэлээд биднийг үдсэн юм.
Улаанбаатар °C 
Сэтгэгдэл (0)
Сэтгэгдэл бичигдээгүй байна