Ерөнхийлөгч У.Хүрэлсүх амиа алдсан цэргийн ар гэрийнхэнтэй холбогдож, эмгэнэл илэрхийлжээ

Зэвсэгт хүчний 326 дугаар ангид өнгөрөгч сарын 20-ны өдөр цэрэгт татагдсан 21 настай оюутан нас барсан харамсалтай хэрэг гарсан талаар бид мэдээлсэн билээ. Одоогоор хууль хяналтын байгууллагууд шалгаж байгаа бөгөөд эцсийн дүгнэлт гараагүй байгаа юм. 

Тэгвэл тус цэргийн ангид үүссэн нөхцөл байдалтай холбоотойгоор  Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх өнөөдөр /2023.11.14/ талийгаач цэргийн ар гэрийнхэнтэй холбогдож, эмгэнэл илэрхийлжээ.

Мөн Ерөнхийлөгчийн Аюулгүй байдал, батлан хамгаалах бодлогын зөвлөх, бригадын генерал Д.Баасандамбыг дээрх асуудалд хөндлөнгийн хяналт тавьж, анхаарч ажиллахыг үүрэг болгосон байна. 

НЭМЭЛТ: Цагдаагийн байгууллагад Хан-Уул дүүрэгт байрлах Зэвсэгт хүчний ….. дугаар ангийн байранд 2023 оны арваннэгдүгээр сарын 13-ны өдрийн 06:21 минутад хугацаат цэргийн алба хаагч нас барсан гэх дуудлага, мэдээлэл бүртгэгджээ. Дуудлага, мэдээллийн дагуу Мөрдөн байцаах алба, Хан-Уул дүүргийн цагдаагийн газар, Нийслэлийн цагдаагийн удирдах газар зэрэг холбогдох алба, нэгжээс Прокурорын байгууллагатай хамтран хойшлуулшгүй ажиллагааг хийж гүйцэтгэж буй.