75 настай Д.Доржсүрэн: Хүүхдүүддээ боорцог хийж өгөөд пижигнэлдэх сайхан байдаг

Ногоон алаг дээлээ өмсөж, охиныхоо гараас чанга хөтлөөд хурдан хурдан алхана. Эмээ, охин хоёр хотын төв орж эмнэлэгт үзүүлээд, “эм”-ээ аваад явж байгаа юм. Охин нь 13:30 аас хичээлтэй учраас эмээ цагаан ултай гутлаараа яаран яаран алхана. 

“Эмээ нь 75 настай, насаараа модны үйлдвэрт мужаан хийсэн. Одоо бол ач зээ нартайгаа пижигнэлдээд л дөрвөн хүүхдээ сургуульд нь зөөдөг. Эд нарынхаа буянд л хөнгөн шингэн хурдан алхаж байна. Манай найзууд надад хурдан алхалтын аварга өгнө гэдэг юм” гээд инээнгээ миний охин чинь ихэр, нэг ихэр нь гэртээ байгаа гэсээр автобусны буудал руу алхав.