“Н.Өнөрцэцэг өлсгөлөн зарлаад 72 цаг болж байна, чийгтэй хүйтэн өрөөнд царай нь цонхийсон байдалд байна”

Зариг.мн сайтын эрхлэгч Н.Өнөрцэцэгийн энэ сарын 4-нд цагдан хорьсон билээ. Энэ талаар түүний өмгөөлөгч  Б.Хонгорзул мэдээлэл өглөө.

Тэрбээр "Үйлчлүүлэгч Н.Өнөрцэцэг  10 дахь өдрөө цагдан хоригдож байна. Өлсгөлөн зарлаад 72 цаг болж байна. Дуу хоолой нь гарахгүй, гар хөл нь чичирсэн байдалтай байна. Даралт нь унаж, царай нь цонхийжээ. Хүн 3-6 хоногт идэж уухаа хоривол биеийн байдал нь хүндэрч, үхэлд хүргэх хэмжээний эрсдэлтэй байдаг. Өмгөөлөгчийн хувьд өлсгөлөн зарлуулахгүй байх үүднээс хэлж, зөвлөж байгаа ч үйлчлүүлэгчийн хүсэлтээр өлсгөлөнг зарласныг зарлалаа. 

Хэдийгээр эрх чөлөөгөө хязгаарлуулсан ч гэлээ халдашгүй чөлөөтэй байх, харгис хэрцгий хүнлэг бус хандахгүй байх заалтуудыг зөрчиж байна. Яагаад гэвэл миний үйлчлүүлэгч унтаж чадахгүй байна. 

Нэгт Өлсгөлөн зарласан биеийн байдал хүндэрч буй үед нь шөнө унтуулахгүй нүүрэнд нь тод цагаан гэрэл тусгаж байна. 

Хоёрт, сэтгүүлч Н.Өнөрцэцэг Хөгжлийн банкны асуудлаар шүгэл үлээсэн. Гэвч тус хэрэгт холбогдон хоригдсон этгээдүүдтэй байнга тааруулж сэтгэл зүйгээр нь дарамталж байна. 

Гуравт, хоол тэжээлээр маш их дутаажээ. Гурав хоногтоо өлсгөлөн зарлаад байгаа ч хоригдсон 10 хоногийнхоо туршид хоол бараг идээгүй юм байна. Тэгэхээр энэ өлсгөлөн гурав хоногоор зогсоогүй. Дөрөвт, эмэгтэй хүнийг чийгтэй нойтон нөхцөлд байлгаж байна. Өнгөрсөн баасан гарагт үйлчлүүлэгч Н.Өнөрцэцэгийн цагдан хориог өөрчлүүлэх хүсэлт гаргасан" гэлээ.