Ж.Ганбаатар: Евро5 ангиллын АИ92 бензиний үнийг 400 төгрөгөөр буулгасан

Сар шинийн баяр дөхөж буй энэ өдрүүдэд шатахууны нөөцийн асуудлаар УУХҮ-ийн сайд Ж.Ганбаатар дараах мэдээллийг цахим хуудснаа нийтэлжээ. Тэрбээр "АИ92 автобензиний нөөц хангалттай байгаа. АИ92 автобензиний нөөц хангалттай байгаа. Үнийн зөрүү нилээн хол байдгаас шалтгаалаад энгийн АИ92-ийн борлуулалт их, Евро5 АИ92-ын борлуулалт бага байдаг.

Манай яамны зүгээс Евро2,  Евро5 ангиллын АИ92 автобензиний үнийн зөрүүг арилгаж, ард иргэд чанартай бензинийг хямд үнээр худалдан боломжийг бүрдүүлэхийг зорьж ажилласны дүнд “Шунхлай” компани Евро5 ангиллын АИ92 бензиний үнийг 400 төгрөгөөр буулгаж  2540 төгрөгөөр борлуулж эхлээд байна. Цаашид бусад ААН-үүдийн үнийг мөн буулгах талаар бид ажиллаж байна.

Дизель түлшний хувьд мөн нөөц хангалттай байгаа. Үнэ буурсан.Уул уурхайд өргөн хэрэглэгддэг Евро5 ангиллын дизель түлшний үнэ литр тутамд 1200 төгрөгөөр буурсан. Энэ үнэ буурсан байдал яг иргэдэд бодитоор мэдрэгдэхгүй байгаа байх. Гэхдээ дизель түлш бол экспорт, үйлдвэрлэлийн салбарын суурь хэрэглээний бүтээгдэхүүн учраас цаашлаад олон эерэг нөлөөллийг эдийн засагт үзүүлнэ.

ОХУ, БНХАУ-ын нийлүүлэгчдийн өрсөлдөөний дүнд цаашид энэ мэт үнэ буух боломж бүрдэнэ гэж харж байна.Шатахуун хомстоно, үнэ өснө гэж олон ч хүн, бүлэг над руу дайрч, бүр зохион байгуулалттай ажиллаж байсан. Бид хийх ёстой ажлуудаа чимээгүй хийгээд л явж байна. Хийсэн ажлын үр дүн бодит нөхцөл байдал үүнийг батлан харуулж байгаа байх” гэжээ.