Сэрэмжлүүлэг: Цасан болон шороон шуурна

Дөрөвдүгээр сарын 17-19-ний өдрүүдэд ихэнх нутгийг хамарсан цасан болон шороон шуурганы аюулт, зарим газарт гамшигт үзэгдэл ажиглагдах төлөвтэй байгааг Цаг уур, орчны шинжилгээний газраас мэдээллээ. Ингэхдээ 17-18-нд шилжих шөнө баруун аймгуудаас эхэлж, 19-ний өдөр зүүн нутгаар шилжинэ. Шуурганы үеэр агаарын температур 10-20 хэмээр огцом буурч, эрс хүйтэрнэ. Дөрөвдүгээр сарын 18-19-нд шилжих шөнө Увс аймгийн өмнөд хэсэг, Баян-Өлгий аймаг, Говь-Алтай аймгийн хойд хэсгээр салхины хурд 15-20 м/с, зарим үед 24 м/с-ээс давж, хүчтэй шороон шуурга шуурч аюулт үзэгдэл үүснэ. Дөрөвдүгээр сарын 18-ны өдөр Завхан аймаг, Хөвсгөл аймаг, Архангай аймаг, Орхон аймаг, Төв аймгийн нутгаар нойтон цас орж, цасан шуурга шуурна. Харин Говь-Алтай аймаг, Архангай аймаг, Өвөрхангай аймаг, Дундговь аймаг, Өмнөговь аймгийн нутгаар салхины хурд 24-28 м/с, зарим үед 34 м/с-ээс давж, гамшгийн хэмжээнд хүрч болзошгүй байна. Дөрөвдүгээр сарын 18-19-нд шилжих шөнө Төв аймаг, Сэлэнгэ аймаг, Хэнтий аймаг, Дорнод аймгийн нутгаар нойтон цас орж, цасан шуурганы аюулт үзэгдэл ажиглагдана. Мөн дөрөвдүгээр сарын 19-ний өдөр Дорноговь аймгийн зүүн хэсэг, Хэнтий аймаг, Дорнод аймаг, Сүхбаатар аймгийн нутгаар салхи, шороон шуурганы аюулт болон гамшигт үзэгдэл үргэлжилнэ. Энэхүү цаг агаарын аюулт үзэгдэл нь 2021 оны гуравдугаар сарын 13-15-ны хооронд болсон, улс орон даяар үргэлжилсэн гамшигт шуургатай төстэй хэмжээнд хүрч болзошгүй байна.