ТӨСӨЛ ХӨТӨЛБӨРИЙН МӨНГИЙГ БАНКИНД БАЙРШУУЛЖ, ХҮҮГ НЬ АВДАГ БАЙДЛЫГ ТАСЛАН ЗОГСООХ ШИЙДВЭР ГАРГАЖЭЭ
Сангийн сайд Ч.Хүрэлбаатар Хөгжлийн санхүүжилтийн газар, Төрийн сангийн газарт төсөл хэрэгжүүлэгч нэгжүүдтэй холбоотой асуудлаар чиглэл өгсөн байна. Үүнд "Төсвийн тухай хуулийн 5 дугаар зүйлийн 5.1.3, 11 дүгээр зүйлийн 11.1.10, 38 дугаар зүйлийн 38.1.5 дах заалтыг тус тус үндэслэн санхүү, мөнгөн хөрөнгөийн удирдлага, төлөвлөлтийг сайжруулах зорилгоор төрийн сангийн нэгдсэн данснаас гадуур байршиж байгаа төсөвт байгууллага, гадаадын зээл тусламжаар хэрэгжиж буй төслүүдийн дансыг Төрийн сангийн нэгдсэн дансанд хамруулах ажлын хүрээнд Сангийн сайдын 2017 оны 12 дугаар сарын 11ний өдрийн "Төрийн сангийн нэгдсэн дансанд гадаад зээл, тусламжийн хөрөнгөөр хэрэгжиж байгаа төслүүдийн дансыг шилжүүлэх тухай" 357 дугаар тушаал батлагдлаа. Үүнтэй холбогдуулан яамдын Санхүүгийн асуудал хариуцсан хэлтэс, нэгжүүд болон төсөл хэрэгжүүлэгч нэгжүүд дараах арга хэмжээг авч хэрэгжүүлэх шаардлагатай. Үүнд:
Нэгдүгээрт, төсөл хэрэгжүүлэгч нэгжийн арилжааны банкин дахь төгрөгийн тусгай болон дэд дансанд байршиж байгаа мөнгөн хөрөнгийг хавсралтад дурдсан Төрийн сангийн дансанд 2017 оны 12 дугаар сарын 15-ны дотор шилжүүлэх
Хоёрдугаарт, төсөл хэрэгжүүлэгч нэгжийн банкинд дахь дансыг хаах арга хэмжээг авч, санхүүжүүлэгч байгууллагад мэдэгдэх
Гуравдугаарт, төсөл хэрэгжүүлэгч нэгжүүд 2017 оны 12 дугаар сарын 15-ны өдрөөс хавсралтаар заасан төрийн сангийн дансаар холбогдох яамдын Төрийн сангийн нэгж дээр төслүүдийн төлбөр тооцоог гүйцэтгэж эхлэх"-ийг үүрэг болгосон байна.
Ингэснээр төсөл хөтөлбөр хэрэгжүүлэхээр Улсын төсвөөс санхүүжилт авсан төсөл хөтөлбөр хэрэгжүүлэгч нартай холбоотой асуудлуудад цэг тавих боломжтой юм. Учир нь төсөл хөтөлбөр хэрэгжүүлэхээр авсан санхүүжилтээ зарим хэрэгжүүлэгч газрууд банкинд байршуулж хүүг нь авдаг гэх мэдээлэл багагүй гарч байсан учир ийнхүү уг асуудлуудыг цэгцлэх шийдвэрийг Сангийн сайдын зүгээс гаргаж энэ сарын 15-ны дотор шийдвэрлэх чиглэл өгчээ.
Сэтгэгдэл (0)
Сэтгэгдэл бичигдээгүй байна