ТАЙЛАНДАД ОН ГАРСААР 20 МЯНГА ГАРУЙ ХҮН ДЕНГЕ ХУМХААГААР ӨВДЖЭЭ

Тайландад 2019 он гарсаар Денге хумхаагаар өвдсөн хүний тоо 20 мянга даваад байгаа тухай “The Nation” сонин мэдээлжээ. Тус мэдээнд өгүүлснээр нэгдүгээр сарын нэгнээс тавдугаар сарын 22-ны хооронд Тайландад 22203 хүн Денге хумхаагаар өвдөж 28 нь нас барсан нь өнгөрсөн жилийнхээ хоёр дахин их тоо.

Иймд иргэд нь Тайландад олноор амардаг улс орны Гадаад харилцааны яамнаас тус улсад аялж, амрахдаа шавьжинд хазуулахаас сэргийлэх, тусгай тос, шүршлэг ашиглах, биеэ аль болох халхалсан хувцас өмсөж байхыг зөвлөж эхэлжээ.

Денге хумхаа нь хөхүүл болон нялх хүүхэд ба насанд хүрэгчдэд халдварладаг томуу төст хурц халдварт өвчин. Халдвар авсан үед 40 градус хүртэл халуурах, толгой ба нүдний ухархайгаар өвдөх, булчин ба үе мөч, яс хүчтэй өвдөх, булчирхай томрох, бөөлжүүлэх, тууралт гарах зэрэг шинж тэмдэг илэрдэг. Халдвар тээгч шумуулын хазалтаар халдварладаг бөгөөд хазуулснаас хойш 4-10 хоногийн нууц үеийн дараагаар дээр дурдагдсан шинж тэмдэг илрэн 2-7 хоног үргэлжилдэг. Тусгайлсан эмчилгээ байдаггүй. Дархлаа сул гэх мэт зарим тохиолдолд ердийн Денге нь хүнд хэлбэрт шилжиснээр 24-48 цагийн дотор үхэлд хүргэх аюултай. Хүнд хэлбэрийн Денгегийн үед амьсгалын дутагдалд орох, хэвлийгээр хүчтэй өвдөх, буйлнаас цус шүүрэх, цусаар бөөлжих зэрэг шинж илэрдэг аж.