Улаанбаатарын авто замын голоор шар хайсыг байрлуулж эхэлсэн. Энэ ажлыг “замын хөдөлгөөнд жолооч нарыг болоод явган зорчигчдыг соёлтой оролцоход сургах” зорилгоор хийж байгаагаа нийслэлийн Захирагчийн ажлын албанаас мэдэгдсэн.

Энэ ажлыг “шоронжсон хот” гэх мэтээр шүүмжлэх нэг хэсэг байхад замын хөдөлгөөнд оролцох соёлыг энэ мэтээр албадан сургах шаардлагатай гэж үзэх хэсэг ч байна. Тэгвэл өнөөдөр Улсын драмын эрдмийн театр, Үндэсний төв номын сангийн замд байрлуулсан шар хашаа “алга болжээ” Эх сурвалжийн мэдээллээр “төрийн тусгай албаны ажилд саад учруулсан учир хайсыг буулгасан” гэсэн мэдээлэл байна.

Харин нийслэлийн Захирагчийн ажлын албанаас энэ шалтгааныг үгүйсгэж байна. Өөрөөр хэлбэл, “замын хэвтээ тэмдэглэгээний ажил хийх гэж байгаа учраас хайсыг түр буулгасан. Хэвтээ тэмдэглэгээг хийж дуусаад хайсыг эргүүлэн байршуулна” гэлээ. Өөрөөр хэлбэл ажил гүйцэтгэх дараалалд алдаа гарсны улмаас шар хайсыг байрлуулаад дахин буулгаж, тэмдэглэгээгээ хийгээд, эргүүлэн хайсаа байрлуулах юм байна.

Шар хайсын талаарх тоон мэдээлэл: Тээврийн цагдаагийн албанаас гаргасан судалгаагаар Улаанбаатарын авто замд 10 мянган метр урт хайс шаардлагатай. Үүнийг нь Улаанбаатар хотын дарга дэмжиж, 2018 онд 4820 метр урт хайс авах төсөв мөнгийг суулгасан байна. Гэхдээ нийт хэдэн төгрөг болсон нь тодорхойгүй байна.

Зөвхөн худалдан авсан 4820 метр хайсыг тээвэрлэх, угсрах суурилуулах ажлыг “Улаанбаатар зам засвар арчлалтын газар” хариуцан гүйцэтгэж байгаа бөгөөд энэ ажилд 38 сая төгрөг зарцуулжээ.