AMAZON ДЭЛХИЙН ХАМГИЙН ҮНЭТЭЙ БРЭНДЭЭР ТОДОРЛОО

Брэндүүдийн үнэ цэнийн судалгааны талаар дэлхийд тэргүүлдэг “Millward Brown” компани ээлжит удаагийн дэлхийн шилдэг брэндүүдийн жагсалат “BrandZ Top 100”-г гаргасан байна. Энэ жилийн жагсаалтыг “Amazon” компани тэргүүлжээ. Жагсаалт гаргасан “Millward Brown” компаний маркетологичид “Amazon” брэндийг 315,6 тэрбум доллараар үнэлсэн байна.

Харин өнгөрсөн жил жагсаалтыг тэргүүлж байсан “Google” энэ жил 309 тэрбум доллараар үнэлэгдэн гуравдугаарт орсон бол 309,6 тэрбумаар үнэлэгдсэн “Apple” хоёрдугаарт орсон байна.

251,2 тэрбумаар “Microsoft” дөрөвдүгээрт, 177,9 тэрбумаар үнэлэгдсэн “Visa” тавдугаарт орсон байна.

Түүнчлэн шилдэг арван брэндийн жагсаалтад “Facebook” ($158,9 тэрбум), “Alibaba” ($131,2 тэрбум), “Tencent” ($130,8 тэрбум), “McDonald's” ($130,4 тэрбум),“AT&T” ($108,4 тэрбум) зэрэг компаниуд оржээ. Жагсаалтын нэгдүгээрт орсон “Amazon” компанийн тэргүүн Жефф Безос нь “Форбс” сэтгүүлээс гаргасан дэлхийн хамгийн баян хүмүүсийн 2019 оны жагсаалтад  112 тэрбум долларын хөрөнгөтэйгээр нэгдүгээрт орсон юм.