Д.ГАНТУЛГЫН ХҮЧИНДСЭН, ХҮЧИНДЭХЭЭР ЗАВДСАН ГЭХ ХОЁР ХЭРЭГ ПРОКУРОРТ ШИЛЖЖЭЭ

УИХ-ын гишүүн Д.Гантулга хүчингийн хоёр хэргээр шалгагдаж, хэрэг нь прокурорт шилжсэн талаар бид мэдээлсэн. Тэгвэл түүнд холбогдох хүчиндсэн, хүчиндэхээр завдсан гэх хоёр үйлдлээр таван жилээр зүйлчилжээ.

Хэргийг шалгаж байх хугацаанд хохирогч гэх эмэгтэйчүүдтэй тохиролцох, гомдлыг барагдуулахаар тохиролцсон байж болох ч хэргийг хэрэгсэхгүй болгох боломжгүй юм. Д.Гантулгад хүчиндүүлсэн гэх Н бүсгүйгээс гадна хүчиндэхийг завдсан хэргээр гомдол гаргасан эмэгтэй нь гэр бүлгүй, ганц бие нэгэн аж. Түүнийг одоогоос долоон сарын өмнө Вива сити-д хүчиндэхээр завдсан хэмээн гомдол гаргажээ. Эдгээр хэргүүдийг АТГ, ЦЕГ хамтран шалгаад ийнхүү прокурорын байгууллагад шилжүүлсэн байна.

Гишүүн асан Д.Гантулгад холбогдох эдгээр хэргүүдийг Нийслэлийн Прокурорын газрын прокурор Н.Ням-Очир хянах аж. Хэрэг прокурорт шилжсэн тул шүүх хурлын тов удахгүй гарах бололтой.