Украйны Цэргийн нисэх хүчний төлөөлөгчид "Embraer EMB-314 Super Tucano" сэнсэт хөдөлгүүртэй онгоц худалдан авах асуудлыг хэлэлцэхээр Бразилд айлчилж байгаа тухай "Infodefensa.com" сайт мэдээлсэн байна. Украйны төлөөлөгчдийн бүрэлдэхүүнийг Цэргийн нисэх хүчний Ерөнхий командлагч, хурандаа генерал С.Дроздов ахалж яваа аж. Одоо онгоц худалдан авах боломжийн талаар "Embraer" компанийн удирдлагатай уулзалт явуулж байна.
"Embraer EMB-314 Super Tucano" нь нисгэгчдийг сургах зориулалттай ч шаардлагатай үед дайрагч онгоцны үүрэг гүйцэтгэж чадах сэнсэт хөдөлгүүртэй онгоц юм. Энэ онгоцыг агаарын довтолгооноос хамгаалах зэвсэглэл байдаггүй, партизаны жижиг бүлэглэлүүдийн эсрэг ашиглах зорилгоор Ливан, Ангол, Сенегал, Буркина-Фасо, Колумби, Мавритан, Гана, Нигери, Афганистан улсууд худалдан авсан байдаг.
Харин Оросоос зэвсэг техникийн ихээхэн дэмжлэг авдаг Донбасс, Донецк дахь Украйны салан тусгаарлагчдыг яагаад ч тааруухан зэвсэгтэй партизаны жижиг бүлэглэл гэж үзэх аргагүй. Жишээлэхэд, Донецкийн салан тусгаарлагчдыг агаарын довтолгооноос хамгаалах "БУК" пуужинт систем ашиглаад 10 мянган метрийн өндөрт цагт 900 км-ийн хурдтай нисч явсан Малайзын "Боинг" онгоцыг унагасан гэж буруутгаад байгаа юм. Харин "Embraer EMB-314 Super Tucano" онгоц нь цагт 560 км хурдлах чадвартай аж.
Гэвч Украйны эрх баригчид өөр бодолтой байгаа бололтой. Тэр тусам хөрөнгө мөнгөний асуудалтай энэ улсад Бразилиас сэнсэт хөдөлгүүртэй онгоц худалдан авахыг нь Америк санхүүжүүлэхээр болсон тухай "Infodefensa.com" сайт мэдээлсэн байна.
Сэтгэгдэл (0)
Сэтгэгдэл бичигдээгүй байна