ХОЙД СОЛОНГОС БА ХЯТАДЫН ХУДАЛДААНЫ ЭРГЭЛТ ӨСЧЭЭ

БНХАУ ба БНАСАУ хоорондын худалдааны эргэлт 15,3 хувиар өссөн тухай Өмнөд Солонгосын "Yonhap News" мэдээлж байна.

2019 оны эхний зургаан сарын байдлаар Хойд Солонгосын Хятад руу хийсэн экспорт 14 хувиар өсч 150 сая доллар болсон бол Хятадаас импортлосон бараа бүтээгдэхүүний хэмжээ 15,5 хувиар өсч 1,14 тэрбум долларт хүрчээ.

Энэ хооронд хоёр улс хоорондын барааны эргэлт нэгдүгээр сард 8,8 хувиар, хоёрдугаарт 4,5 хувиар тус тус буурч байсан ч Вьетнамын Ханойд болсон АНУ ба Хойд Солонгосын хэлэлцээ бүтэлгүйтсэний дараа гуравдугаар сард шууд 38,1 хувиар өссөн. Дараа нь дөрөвдүгээр сард 39,3 хувиар, тавдугаар сард 19,1 хувиар, зургаадугаар сард 8,7 хувиар тус тус өссөөр иржээ.

Солонгосын олон улсын худалдааны ассоциацаас гаргасан мэдээгээр Хойд Солонгосоос Хятад руу гаргасан экспортын дийлэнх нь жимс, далайн бүтээгдэхүүн, гурил гэсэн хүнсний бүтээгдэхүүн, вольфрам ба молибден гэсэн ашигт малтмал ба сүлжмэл эдлэл, цагны эд анги ба хиймэл үс байсан байна.

Энэ хоёр улсын худалдааны тэнцлийн алдагдал нь 2018 онд 2 тэрбум долларт хүрээд байсан ч 2019 оны эхний хагас жилд 1,04 тэрбум доллар болж буурсан. Хятадын нутагт ажиллаж байгаа хойд солонгос иргэдийн тоо 70-80 мянган болсон гэдгийг Өмнөд Солонгосын мэргэжилтнүүд онцолжээ.

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top