Манайд төрийн зарим албаны дарга нар улсын унааг хувьд ашигласан тухай мэдээлэл гардаг ч баримтаар нотлогдсон мэдээний дараа ямар ч хариуцлага хүлээдэггүй. Харин бусад улсад байдал өөр. Тухайлбал, Польшийн парламентын доод танхим буюу Сеймын дарга Марек Кухчиньский гэр бүлийн хамтаар аялалд явахдаа улсын мэдлийн онгоц, нисдэг тэрэг ашигласантай холбоотойгоор өчигдөр албан тушаалаасаа огцорсон тухай эрх баригч "Хууль ба шударга ёс" намын дарга Ярослав Качиньский мэдэгджээ.
Долоодугаар сард Сеймын даргыг гэр бүлийн хамтаар төрсөн нутаг руугаа амрахаар явах болгондоо улсын онгоц ашиглаж байсныг сэтгүүлчид олж мэдсэний дараа хэрэг мандсан. Ийм нислэгийг тайлан дээр албаны яаралтай томилолт гэж заадаг байж. Кухчиньский нь гарцаагүй нотлох баримт дэлгэгдсэний дараагаар 23 удаа улсын онгоцыг хувийн зорилгоор ашигласан гэж байсан ч сэтгүүлчид нарийвчилсан шалгалт хийхэд 100 орчим үйлдэл нь илэрсэн юм. Энэ мэдээ нь Польшийн сонгогчдын бухимдуулсан тул ийнхүү арга буюу суудлаасаа огцорсон байна.
Эрх барьж байгаа намын дарга Ярослав Качиньский нь "Манай спикер хууль зөрчөөгүй. Гэхдээ улс даяар өөр бодолтой байгаа бол эрх баригч нам түүнийг нь дагана" гэж мэдэгдсэн байна. Энэхүү дуулианаас үүдэлтэйгээр Польшийн хуульд зохих өөрчлөлт оруулахаар болсон тухай Засгийн газрын хэвлэлийн төлөөлөгч мэдэгдсэн байна. Цаашдаа, албан тушаалтныг томилолтоор явах үеэр гэр бүл нь дагалдахаар бол албан ёсны төлөөлөгчдийн бүрэлдэхүүн багтан улсын унаагаар үнэгүй зорчихоо болих бөгөөд өөрсдийн мөнгөөрөө тасалбар худалдан авдаг болох аж.
Сэтгэгдэл (0)
Сэтгэгдэл бичигдээгүй байна