Ардчилсан Германы сүүлийн Ерөнхий сайд асан Ханс Модров нь 1990 онд хоёр Германы нэгдэх үеэр Зөвлөлтийн Коммунист намын Ерөнхий нарийн бичгийн дарга байсан Михаил Горбачевыг улсынхаа боломж, чадварыг дутуу үнэлсэн, бодит байдлаас тасарсан удирдагч байсан гэж тодорхойлжээ.
Тэрээр Оросын "РИА Новости" агентлагт өгсөн ярилцлагадаа "Бүгд найрамдах ардчилсан Герман улсын нутаг дээр Зөвлөлт нь 350 мянган цэргээ байршуулж байсан атал Москва нь зөвхөн цэргээ буцааж татах талаар л хэлэлцээ хийж байсан. НАТО-ийн тухай эсвэл Өрнөдийн цэргийн ангиудыг Германаас гаргах талаар ямар ч яриа хэлэлцээг зохих ёсоор нь хийгээгүй. Горбачев агуу улстөрч байгаагүй гэдэг нь надад ойлгомжтой. Зөвлөлт нь манай улсыг хадгалан үлдэж чадаагүй, үгүй болохыг зөвшөөрсөн" гэжээ.
Мөн 1990 оны нэгдүгээр сарын сүүлээр Ардчилсан Германы удирдлагын зүгээс хоёр улсыг нэгтгэх 5-6 жилийн шаталсан төлөвлөгөө санал болгосон бөгөөд түүнийг хэрэгжүүлсэн бол нэгдсэн Герман нь цэргийн хамаарлын хувьд дундыг баримталсан улс болох ёстой байсан гэжээ. Гэтэл Холбооны бүгд найрамдах Герман улсын Канцлер Хельмут Коль нь Зөвлөлтөд хүмүүнлэгийн туслалцаа үзүүлэхээ амласны дараагаар Ардчилсан Германы төлөвлөгөөг мартсан байна.
Модров нь цаашлаад "1990 оны дөрөвдүгээр сард Горбачев нь Герман улс Варшавын гэрээнд бас НАТО-ын гишүүн зэрэг байх боломжтой гэж мэдэгдэж байсан юм. Ингэтэл төөрөлдөж яаж болох вэ дээ? Тэр хүн Варшавын гэрээ гэдэг зүйл үгүй болсон гэдгийг ч ухамсарлаагүй байсан" гэж ярьжээ.
Зөвлөлтийн удирдагч Горбачев нь АНУ болон ХБНГУ-тай тохиролцоо хийснээр 1990 онд Ардчилсан Герман нь өрнөд хөрштэйгээ нэгдсэн төдийгүй нэгдсэн Герман улс нь НАТО-ийн гишүүн улс байх боломжтой болсон юм.
Сэтгэгдэл (0)
Сэтгэгдэл бичигдээгүй байна