"Facebook" хэрэглэгчдийнхээ аудио зурвасыг нууцаар бичлэг хийн хадгалж, түүнээ хөндлөнгийн компани хөлслөн тайлан уншдаг байсан тухай "Bloomberg" мэдээлсэн байна. ."Facebook" нь дуу авиа ялган таних системийн ажиллагааг сайжруулахын тулд хэрэглэгчдийн дуут зурвасыг, тэдний зөвшөөрөлтэй бичиж байсан гэж мэдэгдсэн. Гэвч хэрэглэгчтэй байгуулах гэрээнд тэдний яриаг мэдэгдэлгүйгээр бичлэг хийн хадгалж, гуравдагч этгээдэд нээх тухай ямар ч заалт байгаагүй гэдгийг "Bloomberg" онцолсон байна.
"Facebook" нь хэрэглэгчдийн хувийн нууцтай холбоотой мэдээллийг ил болгосон хэргээр олон удаад шалгагдаж байсан. Тухайлбал, хэрэглэгчийн хувийн мэдээллийг гуравдагч этгээдэд задлахгүй гэсэн тохиролцоог зөрчин АНУ-ын Ерөнхийлөгчийн сонгуулийн үеэр "Cambridge Analytica"-д дэлгэсний төлөө өнгөрсөн сард Америкийн Холбооны худалдаан комиссод таван тэрбум долларын торгууль төлж байсан юм.
"Facebook" хэрэглэгчдийн хувийн яриаг бичиж, тайлан унших ажлаа өнгөрсөн долоо хоногоос бүрэн зогсоосон тухайгаа мэдэгдсэн. Гэхдээ сайндаа биш яг адил хэрэгт "Apple" компани буруутгагдаж эхэлсний дараа больсон бололтой. "Apple" дуут туслах "Siri"-тэй ажиллах үед яриаг нь нууцаар бичиж авч байсныг тогтоосон Калифорни мужийн хэрэглэгч тус компанийг мужийн хууль зөрчсөн төдийгүй АНУ-ын конгресст хувийн мэдээллийн хадгалах талаар худал мэдүүлэг өгсөн гэж буруутгасан байна.
"Apple" нь АНУ-ын Конгресст мэдүүлэг өгөхдөө "Siri" туслах нь зөвхөн "Hey Siri" гэсэн дуут команд өгсний дараа ажиллаж, хэрэглэгчийн яраг бичиж эхэлдэг гэж мэдэгдэж байсан юм. Гэтэл бодит байдал дээр "Siri" туслах гарын санамсаргүй хөдөлгөөнөөс эхлээд тэнгэр дуугарах хүртэл дурын зүйлээс идэвхжин, хэрэглэгчийн зөвшөөрөлгүйгээр бичлэг хийдэг болох нь тогтоогдсон юм.
Сэтгэгдэл (0)
Сэтгэгдэл бичигдээгүй байна