Трампын бариулсан "Trump Tower" цамхаг байрладаг гудамжны нэрийг АНУ-ын Ерөнхийлөгч асан Барак Обамагийн нэрэмжит болгох саналыг Нью-Йорк хотын 250 мянган хүн дэмжиж гарын үсэг зурсан байна.
Хэрэв хотын оршин суугчдын энэхүү санаачлагыг Нью-Йорк хотын мэр болон Хотын зөвлөл дэмжвэл Дональд Трампын гэрийн хаяг нь "Ерөнхийлөгч Бараг Х.Обамагийн нэрэмжит өргөн чөлөөний 721" болж өөрчлөгдөх аж. Гэхдээ Америкт хотын гудамж талбайд нэр олгох журмын дагуу амьд сэрүүн хүний нэрээр нэрлэх хориотой, нэрлэхээр бол нас барснаас нь хоёр жилийн дараа л нэрлэдэг. Гэхдээ америкчууд Обамаг хүндлээд энэ журмаа хэдийн зөрчиж Лос Анжелес орох хурдны замын нэг хэсгийг түүний нэрээр нэрлэсэн байгаа.
Харин одоо хангалттай олон хүний дэмжлэг авсан санаачлагыг хэрхэхийг хотын мэр Билл де Блазио болон Хотын зөвлөлийн гишүүд шийдэхээр болжээ. Гэхдээ Билл де Блазио нь Ардчилсан намаас Ерөнхийлөгчийн сонгуульд нэр дэвшихийн төлөө өрсөлдөж байгаа тул сунгааны өмнө рейтингээ өсгөхийн тулд гудамжийг Обамагийн нэрээр нэрлэж магадгүй гэж үзэх хүмүүс байна.
Харин энэхүү санаачлагыг гаргасан Лос Анжелс хотын оршин суугч Элизабет Роун нь сэтгүүлчдэд ярихдаа "Трамп бусад хүмүүсийг доромжилж, доош нь хийхийн тулд твиттерийг олон ашигладаг тул яагаад яг адил хариуг түүнд барьж болдоггүй юм бэ гэж бодсон юм" гэсэн байна.
Сэтгэгдэл (0)
Сэтгэгдэл бичигдээгүй байна